1 Muhe wangu womgozela Mulungu yaidumwe chihupihupi,

ukombola wangu wolawa kumwake.

2 Yeye yaidumwe niiyo luwe lwangu na ulopozi wangu,

yeye niiyo mhongono yangu, sizagudemeka.

3 Mwizanitowa mbaka zuwaki?

Vino mweye mose mwizanitowa,

fana motowa ng'huta iyeguke na luwa luinamile?

4 Wailungila kumgwisa munhu goya,

wodeng'helela mbuli za uvwizi.

Wotemela mate kwa mbuli zawo,

mbali woduwila muna imizoyo yawo.

5 Muhe wangu uhumule vonimgozela Mulungu yaidumwe,

huwilo jangu dolawa kumwake.

6 Yeye yaidumwe niiyo luwe lwangu na ulopozi wangu,

yeye niiyo mhongono yangu, sizagudemeka.

7 Ulopozi wangu na hishima yangu volawa kwa Mulungu,

yeye niiyo luwe lwangu ugangamale na kimbililo jangu.

8 Mweye wanhu muhuwileni yeye siku zose,

mgubulileni yeye mizoyo yenu,

kwaviya Mulungu niiyo kimbililo jetu.

9 Wanhu wose walinga fana mhumuzi muhala,

wose, wakulu kwa wadodo, hawafaya chinhu.

Wahalingigwa nzamo, wose wahuha kufosa mhumuzi.

10 Sekemuhuwile ubamanyi,

na sekemuvihuwile vinhu vimubawile.

Vinhu venu vihongezeka, sekemuvihuwile.

11 Mulungu kalonga miyanza mingi,

na niye nihulika kuwa Mulungu kana udahi,

12 na kana ulondo wa kufunya umoyo,

kwaviya komuliha chila munhu kwa chiya chiyasang'hane.