1 Weye munhu wili na nguvu, habali koigodela mbuli zihile?

Ulondo wa Mulungu wa kufunya umoyo wabaho siku zose.

2 Chila lusita weye kogesa kudanganiza,

lulimi lwako lulinga fana mwele ukutwa!

Kogesa kulonga mbuli za uvwizi muhala.

3 Kolonda mbuli zihile kufosa zinogile,

na kulonga uvwizi kufosa ukweli.

4 Kolonda mbuli zose za kwagiza wanhu,

na kolonda mbuli za kuwalumiza wanhu.

5 Ivo Mulungu kezakunanga ng'hani,

kezakusegeza na kukugandula muna dihema jako,

kezakung'ola muna iisi ya weli wagima.

6 Wanhu wotenda mbuli zinogile wezawona na wezadumba,

wezamseka na wezalonga,

7 "Muloleni munhu ino,

yeye halondile Mulungu yawe mhongono yake,

mbali kahuwila utajili wake uyaupatile kwa kuwananga wamwenga."

8 Mbali niye nilinga fana mzaituni mbisi

woukula muna Ikaye ya Mulungu.

Nohuwila ulondo wa Mulungu siku zose.

9 Weye Mulungu, nizakutogoza siku zose kwa chiya chiutendile,

nizadigong'onda zina jako hana iwanhu wokwaminika, kwaviya dinoga.