1 Mulungu ni kimbililo jetu na nguvu yetu.

Siku zose kaisasala kuchitaza,

muna ulusita lose lwa magayo.

2 Ivo hachizadumba,

hata one isi yahagudemeka na milima yahatingisika na kugwa muna ibahali,

3 hata one mazi yake yahakuluma na kutibuka, milima nayo yahagudemeka ng'hani, hachizadumba.

4 Lwanda na vizanda vake vowatenda wanhu wa bululu da Mulungu wadeng'helele,

bululu dili na kaye yelile iyokala Yeli Uchanyha Ng'hani.

5 Mulungu kahagati ya bululu, hadizatingisigwa,

kezaditaza chilochilo.

6 Wanhu wa zisi zimwenga woisovula na falume zogwa,

yeye kolava dizi jake na wanhu wogudemeka kwa kudumba.

7 Mndewa Mulungu Yeli na Udahi Wose kahamwe na cheye,

Mulungu wa Yakobo niiyo kimbililo jetu.

8 Izoni mulole sang'hano za Mndewa Mulungu,

loleni sang'hano zake za kudumbiza ziyatendile muna izisi zose.

9 Kokomeleza ng'hondo muna izisi zose,

kobena mhinde na migoha,

na kozisoma ngao.

10 Mulungu kolonga, "Humuleni, muvimanye kuwa niye Mulungu!

Nizatogozigwa na makabila yose,

nizatogozigwa muna iisi yose."

11 Mndewa Mulungu Yeli na Udahi Wose kahamwe na cheye,

Mulungu wa Yakobo niiyo kimbililo jetu.