1 Weye Mndewa Mulungu umkumbuke Daudi,

kumbuka magayo yake yose yoyapatile.

2 Kailaha kwa Mndewa Mulungu,

keka chilagano kwa Mulungu wa Yakobo Yeli na Udahi.

3 "Sizakwingila muna ikaye yangu,

na sizagona muna dikomwa jangu,

4 na sizalekelela nhongo muna yameso yangu,

na sizakukila muna zingohe zangu,

5 mbaka vondanimpatile hanhu Mndewa Mulungu,

hanhu ha kukala ha Mulungu wa Yakobo Yeli na Udahi."

6 Chiihulika mbuli ya sanduku da lagano uko Efulasi,

chidiwona muna imigunda ya Yaala.

7 Chilonga, "Chiteni hanhu hake ha kukala,

chitambike kuna ichigoda chake cha chifalume."

8 Inuka weye Mndewa Mulungu, wize hanhu ha kuhumulila,

weye na sanduku da lagano dodilagusa nguvu zako.

9 Wakulu wa nhambiko wako wayawalizigwe haki fana walo,

wanhu wako wokwaminika wembe nyila za deng'ho.

10 Kwa ichimu cha Daudi msang'hani wako,

sekeumuleme mfalume iyo youmsagule.

11 Mndewa Mulungu kamulahila Daudi,

na chilaho icho hezachigalula,

"Nizamwika imwe wa welesi wako muna ichigoda chako cha chifalume.

12 One wanago wahamha lagano jangu,

na malagilizo yoniwafundiza,

wezahazi chigoda chako cha chifalume siku zose."

13 Kwaviya Mndewa Mulungu kaisagula Sayuni,

kahalonda muladi hawe hanhu hake ha kukala.

14 Kalonga, "Hano ni hanhu hangu ha kuhumulila siku zose,

baho nizakala kwaviya nihamelela mate.

15 Nizaditemela mate ng'hani bululu da Sayuni,

nizawegutiza ngayengaye wokala umo.

16 Nizawalopola wakulu wa nhambiko wa bululu ijo,

na wanhu wake wokwaminika wezakwimba na kutowa ng'henze kwa deng'ho.

17 Baho nizamtenda imwe wa welesi wa Daudi kuwa mfalume mkulu,

mfalume yonimsagule kezamwemwesa fana chitasa chikwaka.

18 Nizawayawaliza chinyala wehi wake,

mbali yeye nizamvaza kombelo da ufalume dimelemeta."