1 Fana mhala viyeli na ng'hilu ya kung'wa mazi ya lwanda,

niivo vinikulonda weye, Mulungu!

2 Nowona ng'hilu ya Mulungu, Mulungu yeli mgima.

Nizahita kumtambikila zuwaki?

3 Masozi yangu yawa ndiya yangu imisi na ichilo,

nouzigwa chila siku, "Vino Mulungu wako kakulihi?"

4 Nokumbuka na kulila,

kwaviya umwaka nihita na lung'husesa lwa wanhu,

niwalongoza kuhita muna Ikaye ya Mulungu,

kuno wotowa ng'henze za hewela,

lung'husesa lwa wanhu watenda dugila!

5 Vino habali nonyululuka muna umoyo wangu?

Habali moyo wangu wosafagila vino?

Nizamuhuwila Mulungu,

nizamwing'ha hewela kaidi,

yeye niiyo Mulungu wangu yonitaza.

6 Moyo wangu wosafagila,

ivo nokukumbuka weye Mndewa Mulungu,

kulawa Yoludani,

kulawa mulima Helimoni na Mizali.

7 Nigaliligwa gombo da mazi,

gombo da mazi yeli habehi,

yotendeza makolongo yamwenga.

Mawimbi yako makulu yanigubika.

8 Mndewa Mulungu kezaniwonela ubazi imisi,

ichilo nimwimbile wila wa nhogolwa,

nimpule Mulungu yoning'ha ugima.

9 Nomulongela Mulungu Luwe lwangu,

"Habali kunizimiza?

Nogendelela kulila kwaviya wehi wangu wonigaza."

10 Wehi wangu viwoniliga ilinga fana kunihonda mavuha yangu.

Wonilongela imisi yose, "Mulungu wako kakulihi?"

11 Vino habali nonyululuka muna umoyo wangu?

Habali moyo wangu wosafagila vino?

Nizamuhuwila Mulungu,

nizamwing'ha hewela kaidi,

yeye niiyo Mulungu wangu yonitaza.