1 Nokulonda weye Mndewa Mulungu, nguvu yangu!

2 Mndewa Mulungu ni luwe lwangu,

mhongono yangu na mulopozi wangu.

Mulungu wangu ni luwe wangu yonimkimbilila,

yeye ni kimililo jangu na nguvu za ulopozi wangu na mhongono yangu.

3 Nomulamba Mndewa Mulungu yofaya kwing'higwa nhogolwa,

na nolopoligwa kulawa kwa wehi wangu.

4 Nzabi za ifa zinizinga,

mazi mengi yokuluma yanigubika.

5 Nzabi kulawa kuzimu zinizunguluka,

mitego ya ifa ininamata.

6 Muna uuzidilwa wangu nimtanga Mndewa Mulungu,

nimulamba Mulungu wangu yanitaze.

Kahulika dizi jangu kuna ikaye yake,

kahulika vinimpulile yanitaze.

7 Isi igudemeka na itingisika,

vandusilo va milima vigudemeka,

vigudemeka kwaviya Mndewa Mulungu kawona ludoko.

8 Yosi difuka kulawa muna imhula yake,

moto woulunguza ulawa muna umulomo wake,

makala ya moto yazipuka kulawa kumwake.

9 Kaunamiza ulanga nayo kahulumuka hasi,

kukala na wingu titu hasi ya magulu yake.

10 Kakwela mchanyha ya kelubi, kazumha,

kaguluka himahima uchanyha fana mabawa mudibeho.

11 Kaigubika ziza banzi zose,

kazungulukigwa na mawingu yazamile yamemile mazi.

12 Lumwemwe lumweka kuulongozi wake,

kuulanga kulawilila mvula ya mabwe na makala ya moto.

13 Mndewa Mulungu kaduma kuulanga,

Mulungu Yeli Uchanyha Ng'hani kalava dizi jake,

kulawilila mvula ya mabwe na makala ya moto.

14 Kawatowa misale yake wehi na kawapwililisa,

lumwemwe lukulu luwatimula.

15 Bawe dili hasi ya bahali diwoneka, vandusilo va isi vigubuligwa,

kwa kubwakila kwako, weye Mndewa Mulungu,

vigubuligwa kwa luvumo lwa mhumuzi ya mhula yako.

16 Kahulumuka kulawa uchanyha na kanyamhilila,

kanivabula muna yamazi mengi.

17 Kanilopola kulawa kwa mwihi wangu yeli na nguvu,

kanilopola kulawa kwa waja wanihile,

kwaviya wakala na nguvu kufosa niye.

18 Wanitowa vinikalile muna uuzidilwa,

mbali Mndewa Mulungu kakala mtazi wangu.

19 Kanilava kanigala hanhu ha kuilegeha,

kanilopola kwaviya kanogelwa na niye.

20 Mndewa Mulungu kaning'ha gweko kwa unovu wangu,

kanigweka kwaviya niye nabule ubananzi.

21 Kwaviya nizisondelela nzila za Mndewa Mulungu,

na sikalile kutali na Mulungu wangu kwa wihi.

22 Kwaviya nizindilila malagilizo yake yose,

silekile kusondelela ndagilizi zake.

23 Nikala voilondeka haulongozi wake,

niiteganya na wihi wangu.

24 Mndewa Mulungu kaniliha vonilondeka,

yeye kovimanya kuwa makono yangu yabule ubananzi.

25 Weye kokwaminika kwa wanhu wokwaminika,

kolagusa unovu wako kwa wanhu weli na moyo unogile.

26 Weye kowatendela mbuli zinogile wanhu weli na mizoyo inogile,

mbali kwa waja wabalabala koilagusa kuwa mbala kufosa wawo.

27 Weye kowakombola wanyendanyenda,

mbali waja woigoda kowahulumusa.

28 Weye Mndewa Mulungu kobwinha chitasa changu,

weye konimwemwesela ziza jangu.

29 Kwa utazi wako nodaha kudihuma bumbila da wehi,

kwa kutazigwa na Mulungu wangu nodaha kukwela ng'huta.

30 Nzila yake Mulungu igoloka,

mbuli ya Mndewa Mulungu izalawilila,

yeye niiyo kimililo kwa wose womkimbilila.

31 Habule yeli Mulungu, mbali Mndewa Mulungu,

habule yeli mhongono mbali Mulungu wetu.

32 Mulungu niiyo yoning'ha nguvu,

na konilanguliza vinogile.

33 Kaitenda migulu yangu sekeitelebuke fana migulu ya ng'hulungu,

na kanidahiza nime uchanyha ng'hani kulugongo.

34 Koifunza makono yangu kuitowa ng'hondo,

makono yangu idahe kukwega upinde ugangamale.

35 Kuning'ha kimililo da ulopozi wako,

na mkono wako wa kulume unitaza,

unovu wako unitenda niwe mkulu.

36 Kuzigalamulila nyafasi nzila zangu,

magulu yangu hayatelebuke.

37 Niwawingisa wehi wangu na kuwagwila,

sibwelile kuchisogo mbaka viniwanangile.

38 Niwagwisa hasi muladi sekewadahe kwinuka kaidi,

wagwa hasi ya migulu yangu.

39 Kuning'ha nguvu ya kuitowa ng'hondo,

kuwagwisa hasi yangu wehi wangu.

40 Kuwatenda wehi wangu wakimbile,

na waja wanihile niwananga.

41 Walamba kutazigwa, mbali habule wa kuwalopola,

wamulamba Mndewa Mulungu, mbali hawedike.

42 Niwadunda wawa fana timbwisi dihembelusigwa na mbeho,

niwabojoga fana nhope ya muna inzila.

43 Kunilopola kulawa kwa wanhu wonitowa,

kunitenda mtawala wa zisi zose,

wanhu siwamanyile wanisang'hanila.

44 Bahaja viwahulike mbuli zangu wanitegeleza,

nyambenyambe watogola niwalangulize.

45 Nyambenyambe wafa moyo,

weza wogudema kulawa muna zimhongono zawo.

46 Mndewa Mulungu mgima! Luwe wangu yatogozigwe!

Mulungu Mulopozi wangu yenuligwe!

47 Yeye ni Mulungu yolihiliza kwa ichimu changu,

na kuzika zisi hasi yangu.

48 Kanilopola kulawa kwa wehi wangu,

kanitogoza kwa wehi wangu,

na kanyepula na wanhu wasede.

49 Ivo nizakutogoza weye Mndewa Mulungu hagati ya zisi zose,

nizadimbila nhogolwa zina jako.

50 Yeye komwing'ha mfalume wake uhumi mkulu,

kolagusa ulondo wake wa kufunya umoyo kwa munhu yoyamsagule,

komulagusa ulondo Daudi yoyekigwe hakwe na welesi wake siku zose.