1 Uniwonele ubazi, weye Mulungu, uniwonele ubazi,

kwaviya nokukimbilila weye,

nizakimbilila hana disisila da mabawa yako,

mbaka vulavumbi da kunanga vondadifose.

2 Nompula Mulungu Yeli Uchanyha Ng'hani,

Mulungu yofikiza malungilo yake kumwangu.

3 Kezagala utazi kulawa kuulanga na kunilopola,

kowakalikila waja woniwinza habehi.

Mulungu kezagendelela kunilonda na kuwa mwaminika kumwangu siku zose.

4 Wehi wangu wonizinga fana simba,

nigona hagati ya wanhu wano walingile fana wanyama weli na nzala,

meno yawo yalinga fana migoha na misale,

milimi yawo ilinga fana mwele ukutwa.

5 Uhishimigwe weye Mulungu uli kuchanyha ng'hani!

Ukulu wako wenele chila hanhu.

6 Wehi wanitegela lwavu wanigwile,

nifa moyo kwa ichimu cha uzidilwa.

Nidulisigwa hasi na manhesa,

wanihimbila kombo muna inzila yangu,

mbali wadumbukila wawo wenyewo.

7 Weye Mulungu, moyo wangu haudumba chinhu, moyo wangu haudumba chinhu.

Nizakwimba na kudeng'helela kwa moyo wangu wose.

8 Lamka, muhe wangu!

Lamka bango na chinubi!

Nizailamsa chilochilo kwa wila wangu!

9 Weye Mulungu, nizakwing'ha hewela hagati ya wanhu wose,

nizakwimbila nhogolwa hagati ya wanhu wa zisi zose.

10 Ulondo wako mkulu umema mbaka kuulanga,

uwaminika wako umema mbaka kuna yamawingu.

11 Utogozigwe weye Mulungu uli kuchanyha ng'hani!

Ukulu wako wenele chila hanhu.