1 Weye Mulungu, chihulika kwa magutwi yetu,

wasaho zetu wachilongela,

sang'hano ziuwatendele muna zisiku zawo umwaka.

2 Kuwawinga wanhu wa zisi nyingi kwa nguvu zako,

hanhu hawo kuweng'ha wanhu wako,

kuzitagusa zisi nyingi,

kuwapwililisa wanhu wako muna izisi izo.

3 Wanhu wako hawaisolile isi kwa upanga wawo,

na hawahumile kwa makono yawo,

mbali kuwahuma kwa mkono wako wa kulume,

kuwa hamwe nawo kwaviya kuwalonda.

4 Weye ni mfalume wangu, Mulungu wangu,

kowatenda welesi wose wa Yakobo wahume.

5 Kwa nguvu zako chowahuma wehi wetu,

kwa zina jako chowabojoga waja wose wochitowa.

6 Sihuwila upinde wangu,

na panga jangu hadidaha kunilopola.

7 Mbali kuchilopola kulawa muna yamakono ya wehi wetu,

kuwaguma chinyala wanhu wose wochihila.

8 Chiigodela weye Mulungu imisi na ichilo,

na chizaditogoza zina jako siku zose.

9 Mbali sambi kuchileka na kuchiguma chinyala,

huisondelela na mabumbila ya watowang'hondo wetu.

10 Kuchitenda chiwakimbile wehi wetu,

na wanhu wochihila wasola vinhu vetu.

11 Kuchitenda fana ng'hondolo wogaligwa kuchinjigwa,

na kuchipwililisa muna izisi zimwenga.

12 Kuwachuuza wanhu wako kwa hela ndodo,

na hupatile chochose chongezeke.

13 Kuchitenda chiwe chilozo kwa wakaya wayetu wose,

wochizeha na kuchiseka ng'hani.

14 Kuchitenda chehuligwe na wanhu wa zisi zimwenga,

wanhu wochitingisila yamatwi.

15 Siku zose nina chinyala.

Chihanga changu cholagusa kuwa nowona chinyala,

16 kwa mbuli zihile za waja woniliga,

na wehi wangu na waja wolihiliza.

17 Mbuli zino zose zichilawilila,

mbali hachikuzimize weye,

na hachibenile lagano jako.

18 Chikala waminika,

na hachilekile kuzindilila malagilizo yako.

19 Kuchitowa na kuchileka hanhu howokala mbwizi,

na kuchileka muna diziza totolo.

20 One chidizimiza zina da Mulungu wetu,

na kumtambikila mulungu wa uvwizi,

21 Mulungu koimanya mbuli iyo,

kwaviya kozimanya mbuli zili muna imizoyo ya wanhu.

22 Kwa ichimu chako chokomigwa chila siku,

chiwa fana ng'hondolo wogaligwa kuchinjigwa.

23 Lamuka, weye Mndewa! Habali kugona?

Inuka! Sekeuchileme siku zose!

24 Habali kofisa chihanga chako?

Habali kozimiza vichiwoneligwa na vichibamanyigwa?

25 Kwaviya chigona chingubingubi muna ditimbwisi,

ng'huli zetu ziilumba na isi.

26 Inuka wize uchitaze!

Uchikombole kwa ichimu cha ulondo wako wa kufunya umoyo.