1 Weye Mndewa Mulungu, unitegeleze vonikulamba kwaviya notenda mbuli zilondeka,

kinga gutwi jako, utegeleze vonikulamba.

Uhulike mbuli zangu zonikupula zilibule udelenya.

2 Weye kodaha kunihumiza fana voilondeka,

kwaviya kuvimanya niye notenda voilondeka.

3 Weye kuumanya moyo wangu. Konizila ichilo na kunigeza,

mbali hwizawona wihi kumwangu.

Sizatenda uhasanyi kwa kulonga.

4 Kwa sang'hano ziwosang'hana wanhu,

niye nizindilila lagilizo jako,

niyepula na nzila za wanhu wotenda mbuli zihile.

5 Nyayo zangu ziilumbagiza na nzila zako,

migulu yangu haisegezigwe.

6 Nokulamba weye Mulungu, kwaviya weye konidika,

unikingile digutwi, uhulike mbuli zangu.

7 Lagusa ulondo wako wa kufunya umoyo,

uwakombole kulawa kwa wehi wawo,

waja wokimbilila kumwako muladi kukala goya.

8 Unikalize fana voudikaliza ziso jako,

unifise muna disisila da mabawa yako.

9 Unifise kutali na ng'hondo ya wanhu wotenda mbuli zihile,

kutali na wehi wangu weli banzi zose.

10 Wawo wabule ubazi muna imizoyo yawo,

wamema mbuli za magoda muna imilomo yawo.

11 Wonisondelela na kunizunguluka,

wonisepa muladi wanigwise hasi.

12 Waisasala kunivavatula fana simba,

fana simba viyosepasepa ukala.

13 Inuka weye Mndewa Mulungu,

uwawinge na kuwapolomola.

Kwa panga unilopole kulawa kwa wanhu wotenda mbuli zihile.

14 Weye Mndewa Mulungu, kwa mkono wako,

unilopole muna yamakono ya wanhu wawo.

Wohokela gweko muna uugima uno muhala.

Uwamemeze nhaguso youwekile,

wapate ya kuwafaya na wana wawo,

wawalekele mbaka wazukulu zawo.

15 Mbali niye nikulole chihanga chako, kwaviya nitenda voilondeka,

nihalamka nimemezigwe na deng'ho kwa kuchiwona chihanga chako.