1 Weye Mndewa Mulungu, sekeuchitogoze cheye mbali uditogoze zina jako,

kwa ichimu cha ulondo wako wa kufunya umoyo na uwaminika wako.

2 Habali wanhu wa zisi zimwenga wolonga,

"Kakulihi Mulungu wawo?"

3 Mulungu wetu kakuulanga,

kotenda mbuli zose zoyolonda.

4 Nyang'hiti za milungu yawo zolumbigwa kwa hela na zahabu,

zotendigwa na wanhu.

5 Zina milomo mbali hazidaha kulonga,

zina meso mbali hazidaha kulola.

6 Zina magutwi mbali hazidaha kuhulika,

zina mhula mbali hazidaha kunusa.

7 Zina makono mbali hazidaha kwamha,

zina magulu mbali hazidaha kugenda,

zina milomo mbali hazidaha hata chidogo kulava dizi.

8 Waja wozitenda wezalinga fana izo,

iviya wose wozihuwila wezalinga fana izo.

9 Mweye Waisilaili muhuwileni Mndewa Mulungu,

yeye niiyo mtazi wenu na ngao yenu.

10 Mweye wanhu wa kaye ya Haluni, muhuwileni Mndewa Mulungu,

yeye niiyo mtazi wenu na ngao yenu.

11 Mweye womumdumba Mndewa Mulungu, muhuwileni yeye,

yeye niiyo mtazi wenu na ngao yenu.

12 Mndewa Mulungu kachikumbuka,

nayo kezachitemela mate.

Kezaitemela mate kaye ya Isilaili.

Kezaitemela mate kaye ya Haluni.

13 Kezawatemela mate waja womuhuwila Mndewa Mulungu,

kezawatemela mate wakulu na wadodo.

14 Mndewa Mulungu yamtendeni mongezeke mweye wose na wanenu.

15 Mndewa Mulungu yalumbile ulanga na isi, yamtemeleni mate.

16 Ulanga ni wa Mndewa Mulungu muhala,

mbali isi kaweng'ha wanhu.

17 Wanhu wadanganike hawamtogoza Mndewa Mulungu,

waja wohumuluka hanhu hahupike ha ifa hawamtogoza.

18 Mbali cheye chili wagima chizamtogoza Mndewa Mulungu,

kwandusila diyelo na siku zose.

Mndewa Mulungu yatogolwe.