1 Isi na chila chinhu chili umo cha Mndewa Mulungu,

isi yose na wanhu wokala umo ni wake.

2 Kwaviya keka isi uchanyha ya bahali,

kaitenda isi igangamale uchanyha ya mazi mengi.

3 Yelihi yondayakwele kuna umulima wa Mndewa Mulungu?

Yelihi yondayeme hanhu hake helile?

4 Munhu yosang'hana mbuli zinogile na yeli na moyo unogile,

ija hatambikila vinhu va uvwizi,

na heka chilagano cha uvwizi.

5 Kezatemeligwa mate na Mndewa Mulungu,

na kezapetigwa kanoga kwa Mulungu wa ulopozi wake.

6 Niivo ili kwa welesi wa wanhu wokwiza kumwake,

wanhu wokwiza kumtambikila Mulungu wa Yakobo.

7 Vugukeni mweye nyivi,

vugukeni mweye nyivi za umwaka,

muladi mfalume mkulu yengile.

8 Mfalume mkulu yelihi?

Mndewa Mulungu yeli na nguvu na udahi,

Mndewa Mulungu yeli na nguvu kuna ing'hondo.

9 Vugukeni mweye nyivi,

vugukeni mweye nyivi za umwaka,

muladi mfalume mkulu yengile.

10 Mfalume mkulu niiyo yelihi?

Mndewa Mulungu, Mulungu Yeli na Udahi,

yeye niiyo mfalume mkulu.