1 Nowalamba, wambwiya zangu,

mkinge digutwi mtegeleze mbuli zonimulongelani,

mtegeleze mbuli zonimfunzani.

2 Nizalonga na mweye kwa masimwe,

nizawafambulila mbuli zifisigwe zilawile kulingwa.

3 Chizihulika mbuli izo na kuzimanya,

mbuli zowachilongele wasaho zetu.

4 Hachizawafisa wanetu mbuli izo,

mbali chizawalongela welesi ukwiza,

sang'hano ng'hulu za Mndewa Mulungu,

na mbuli za mauzauza zoyatendile.

5 Mulungu kaweng'ha wanhu wa welesi wa Yakobo malagilizo,

na keka ndagilizi kwa wanhu wa Isilaili.

Kawalagiliza wasaho zetu,

wawafundize wana wawo,

6 muladi wanhu wa welesi wondawize wayamanye malagilizo yake

na kuwalongela wana wawo.

7 Iviya wamuhuwile kwa Mulungu,

na sekewazimize sang'hano za Mulungu,

mbali wazindilile malagilizo yake.

8 Sekewawe fana wasaho zawo,

wanhu watatali na hawategeleza wanhu,

welesi uyangaya muna uhuwilo,

mizoyo yawo haikalile na uwaminika kwa Mulungu.

9 Waefulaimu weli na mhinde na misale,

wakimbila siku ija ya ng'hondo.

10 Hawazindilile lagano da Mulungu,

na walema kukala kwa malagilizo yake.

11 Wazimiza mbuli ziyatendile,

na mauzauza yoyawalaguse.

12 Katenda mauzauza haulongozi wa wasaho zawo,

muna iisi ya Misili, muna dibululu da Soani.

13 Kaigola bahali, kawafoseza umo,

na kayatenda yamazi yeme fana ng'huta.

14 Imisi kawalongoza kwa wingu,

ichilo chose kawalongoza kwa bung'hulo da moto.

15 Katula miluwe uko kudibwilingu,

kaweng'ha mazi mengi fana bahali.

16 Katenda nzasa ilawe muna uluwe,

katenda mazi yakilime fana lwanda.

17 Mbali viwakalile kudibwilingu wamuhasanya Mulungu Yeli Kuchanyha Ng'hani.

18 Wamgeza Mulungu muna imizoyo yawo,

na wamuwangiliza yaweng'he ndiya ziwalondile wawo.

19 Wamuliga Mulungu,

walonga, "Vino Mulungu kodaha kuchigolela ndiya muno muna dibwilingu?

20 Kweli, kalutowa luwe na mazi yalawa fana lwanda,

mbali kodahaze kuching'ha cheye wanhu wake ndiya na nyama?"

21 Mndewa Mulungu viyahulike, kehilwa ng'hani,

ludoko lwake luwakila wanhu wa Yakobo fana moto.

Wanhu wa Isilaili walaviligwa ludoko,

22 kwaviya walema kumuhuwila Mulungu,

na hawamuhuwile kuwa kodaha kuwalopola.

23 Mbali kayalagiliza mawingu,

na kavugula mazonzo ya kuulanga.

24 Kaweng'ha mana muladi waje,

kaweng'ha ndiya ya kuulanga.

25 Wanhu waja gate da wasenga wa kuulanga,

kawagalila ndiya yofaya.

26 Kadilekela beho kulawa ulawilo wa zuwa,

na kadigala beho da kusi kwa udahi wake.

27 Kawagalila nyama fana matimbwisi,

na ndege woguluka fana msanga wa mhwani.

28 Maabaho Mulungu kawatenda ndege wagwe,

muna dilago da wanhu wake habehi na mahema yawo.

29 Wanhu waja mbaka weguta,

kwaviya kakala kaweng'ha chiya chawachilondile.

30 Wang'hali hawanakomeleza kuja chowachilondile,

hata vichikalile ching'hali muna imilomo yawo,

31 Mulungu kawawonela ludoko,

na kawakoma wanhu weli na nguvu.

Kawagwisa wabwanga wa Isilaili.

32 Mbali wagendelela kuhasanya,

hawayahuwile mauzauza yake.

33 Ivo kazikanhiza siku zawo fana si chinhu,

na miyaka yawo kwa ndilo za kusinhukiza.

34 Viyawakomile, wamwenga wamzahila,

wasigale wambwelela Mulungu,

wamkwenhukila Mulungu kwa moyo umwe.

35 Wakumbuka kuwa Mulungu kakala luwe lwawo,

Mulungu Yeli Uchanyha Ng'hani, mulopozi wawo.

36 Mbali wamvwizila kwa milomo yawo,

walonga uvwizi kwa milimi yawo.

37 Mizoyo yawo haigangamale,

iviya hawazindilile lagano jake.

38 Mbali Mulungu kakala na ubazi,

kawalekelela uhasanyi wawo na hawanangile bule.

Miyanza mingi kalukimilila ludoko lwake,

hebu halaguse ludoko lwake lose.

39 Kakumbuka kuwa wawo wakala nyama muhala,

wakala fana beho difosa na hadibwela.

40 Wamulema kudibwilingu miyanza mingi,

na kumguma luholozi.

41 Wamgeza Mulungu chila lusita,

wamsovula Mulungu Yelile wa Isilaili.

42 Hawakumbuke udahi wake,

siku viyawakombole kulawa kwa wehi wawo.

43 Hawakumbuke vilaguso vake muna iisi ya Misili,

na mauzauza yake muna dibawe da Soani.

44 Kaigalula mizanda yawo kuwa damu,

muladi sekewadahe kung'wa mazi ya vizanda vawo.

45 Kawagalila mabumbila ya ng'honzi kuwagaza,

na mabula kuwabananga.

46 Kawagala nzige waja ndiya zawo,

na kunanga migunda yawo.

47 Kaibananga mizabibu yawo kwa mvula za mabwe,

na kaibena mikuyu yawo kwa vulavumbi.

48 Kawakoma ng'ombe wawo kwa mvula ya mabwe,

na kawakoma wanyama wawo kwa ng'huwa.

49 Kawagalila manhesa makulu,

ludoko lwake luwa lukulu ng'hani,

na kawagalila bumbila da wasenga wa kuulanga waja wonanga chila chinhu.

50 Kawalavila ludoko lwake,

na hawasegezele ifa,

mbali kawagalila hulo.

51 Kawakoma waudele wose wa Misili,

wana wa mwanduso wa wanhu weli muna zikaye zose za Misili.

52 Mbali kawalongoza wanhu wake fana ng'hondolo,

kawadima fana mifugo muna ichuwala.

53 Kawalongoza vinogile na hawadumbile,

mbali bahali iwagubika wehi wawo.

54 Kawagala mbaka muna iisi yake yelile,

kuna umulima uyausolile kwa nguvu.

55 Kawawinga wakaya wa zisi zimwenga haulongozi wa Isilaili,

na kuwagolela zisi zawo fana uhazi,

muladi makabila ya Isilaili yakale muna zikaye zawo.

56 Mbali wanhu wamgeza Mulungu Yeli Uchanyha Ng'hani,

na walema kuzindilila ndagilizi zake.

57 Wahasanya fana wasaho zawo,

hawafaya fana msale ubeneke viuhembeluka.

58 Kwaviya watambikila nyang'hiti zawo za milungu hana ihanhu hawo ha kutambikila,

wamtenda Mulungu yawone ludoko.

59 Mulungu viyawawonile, kengilwa na ludoko,

kawalema ng'hani Waisilaili.

60 Kasegela hanhu hayakalile uko Shilo,

hanhu hayakalile hagati ya wanhu.

61 Kawalekela wehi wawo wasole Sanduku da Lagano dikalile chilaguso cha nguvu zake na ukulu wake.

62 Kawalekela wanhu wake wakomigwe kwa mapanga,

kauwonela ludoko ng'hani uhazi wake Isilaili.

63 Ng'hondo iwakoma wabwanga wawo,

na wandele wawo wa chike hawawile na walume wa kuwasola.

64 Wakulu wa nhambiko wawo wakomigwa kwa mapanga,

mbali wagane wawo wapotwa kulila.

65 Maabaho Mndewa Mulungu kenuka fana viya kalawa mzinhongo,

fana viya munhu yasinduke viyokwinuka.

66 Kawatowa na kuwahuma wehi wake,

kawaguma chinyala siku zose.

67 Kaulema welesi wa Yosefu,

hadisagule kabila da Efulaimu.

68 Mbali kadisagula kabila da Yuda,

mulima Sayuni, uyaulondile.

69 Kazenga kaye yake ya kutambikila igangamale fana ulanga,

fana isi iyaigangamize siku zose.

70 Kamsagula Daudi msang'hani wake,

kamulava muna ivikwama va ng'hondolo.

71 Kamulava muna usang'hano wa kudima ng'hondolo wokong'heza,

yawe mdimi wa wanhu wake Yakobo,

na wanhu wa Isilaili, wanhu wa Mulungu.

72 Daudi kawalolesa goya kwa moyo wake wose,

kawalanguliza kwa ugalu ng'hani.