1 Mwing'heni hewela Mndewa Mulungu na mumtogoze.

Walongeleni wanhu wa zisi zose mbuli ziyatendile.

2 Mwimbileni yeye, mwimbileni kwa nyila za nhogolwa,

gong'ondeni sang'hano zake za mauzauza.

3 Muigodele zina jake jelile,

waja womzahila Mndewa Mulungu, wadeng'helele.

4 Mpuleni Mndewa Mulungu na muhuwile nguvu zake.

Mpuleni Mndewa Mulungu siku zose.

5 Mukumbuke mawewedeko yoyasang'hane,

muyakumbuke mauzauza yake na viya viyahumize,

6 mweye welesi wa Bulahimu msang'hani wake,

mweye welesi wa Yakobo, womusaguligwe nayo.

7 Yeye niiyo Mndewa Mulungu, Mulungu wetu,

kowahumiza wanhu muna izisi zose.

8 Yeye kokumbuka lagano jake siku zose,

mbuli iyawalagilize wanhu wa nyelesi zose.

9 Kokumbuka lagano diyatendile na Bulahimu,

kokumbuka chilaho chiyamulahile Isaka.

10 Kadigangamiza lagano ijo kwa Yakobo,

na kamwing'ha Isilaili lagano diwe da siku zose.

11 Kalonga, "Nizakwing'ha isi ya Kanaani iwe yako."

12 Hawakalile wengi,

wakala wadodo, iviya wakala wafosanzila muna iisi ya Kanaani,

13 wawegela chila isi,

walawa ufalume umwe wahita ufalume umwenga.

14 Mulungu hamulekele munhu yawawonele,

na kawakalikila wafalume kwa ichimu chawo.

15 Kalonga, "Sekemuwadalise wanhu wangu woniwasagule kwa sang'hano yelile,

na sekemuwalumize walotezi wangu."

16 Mulungu kagala nzala muna iisi,

kabananga ndiya yawo yose.

17 Mbali kawalongozela munhu imwe,

Yosefu yoyaguligwe uko fana mtumwa.

18 Wamulumiza migulu yake kwa minyololo,

wamfunga kwa zuma mwiisingo.

19 Mbaka mbuli ziya ziyalotele zilawilila,

mbuli ya Mndewa Mulungu ilagusa kuwa Yosefu kalonga goya.

20 Mfalume kawatuma wanhu wamfungule,

mkulu wa wanhu kamulekela yailegehe.

21 Kamwika kuwa mndewa wa kaye yake,

na mtawala wa vinhu vake vose.

22 Yosefu kawalongoza wakulu wa mfalume viyalondile,

na kawafunza ubala walala wa mfalume.

23 Baho Isilaili kengila mwiisi ya Misili,

Yakobo kawa mfosanzila muna iisi ya Hamu.

24 Mulungu kawatenda wanhu wake weleke ng'hani,

kawatenda wawe wengi kufosa wehi wawo.

25 Kawahindula Wamisili wawehile wanhu wake,

na Wamisili wawatendela mbuli zihile.

26 Kamtuma Musa msang'hani wake,

hamwe na Haluni yoyamsagule.

27 Watenda vilaguso va Mulungu kwa Wamisili,

na mauzauza muna isi ya Hamu.

28 Mulungu kagala ziza muna iisi yose,

mbali Wamisili walema mbuli yake.

29 Kagalusa mazi yawo kuwa damu,

kawakoma somba wawo wose.

30 Isi yawo imema mabula,

mbaka yengila muna ikaye ya mfalume.

31 Mulungu kalonga na yalawilila mabumbila ya ng'honzi,

na ulombe muna iisi yawo yose.

32 Kaigalusa mvula kuwa mvula ya mabwe,

na lumwemwe lumwemwesa isi yawo yose.

33 Kainanga mizabibu na mibiki ya mitini yawo,

iviya kaibena mibiki ya isi yawo.

34 Mulungu kalonga na walawilila nzige,

na mbalangulu hawapeteka.

35 Waigegeda mimeya yose muna iisi,

wayaja mazao yawo yose.

36 Kawakoma wana waudele muna iisi yawo,

kawananga wana wa mwanduso wa Wamisili.

37 Maabaho kawalava wanhu wa Isilaili kuno wana hela na zahabu,

muna yamakabila yawo habule yaikwalile.

38 Wamisili wadeng'helela viwasegele,

kwaviya wadumba kwa ichimu chawo.

39 Mulungu katanda wingu mchanyha kuwagubika,

na kagala moto ulave bung'hulo ichilo.

40 Viwapulile kawagalila ng'hwale,

kawegutiza ndiya ya kuulanga.

41 Kautula luwe, mazi yalawa,

na yakilima muna dibwilingu fana lwanda.

42 Kwaviya kakumbuka chilagano chake chelile,

chiyamulaganile Bulahimu msang'hani wake.

43 Kawalava wanhu wake kwa deng'ho,

wanhu woyawasagule wadeng'helela.

44 Kaweng'ha zisi za manyambenyambe,

wasola matunda yawahandile wanhu wamwenga.

45 Mulungu katenda ivo muladi wanhu wake wamhe ndagilizi zake,

na kuzindilila malagilizo yake.

Mndewa Mulungu yatogolwe.