1 Zabuli ya Daudi

Nizakutogoza weye Mndewa Mulungu, kwa moyo wangu wose,

nizakwimba wila wa nhogolwa kuno milungu imwenga yotegeleza.

2 Nizakutumbalila mavindi kuikwenhukila kaye yako yelile,

na nizaditogoza zina jako,

kwa ichimu cha ulondo wako wa kufunya umoyo na uwaminika wako,

na kwaviya weye kotogoligwa kufosa vinhu vose,

zina jako na mbuli yako votogoligwa kufosa vinhu vose.

3 Vinikupulile, weye kunidika,

kunitenda galu na kunigangamiza.

4 Wafalume wa zisi zose vondawahulike mbuli zoulonga,

wakutogoze weye Mndewa Mulungu.

5 Wezakwimba nhogolwa za sang'hano zako, weye Mndewa Mulungu,

kwaviya weye mkulu ng'hani.

6 Mndewa Mulungu kauchanyha kowalola goya ngayengaye,

mbali kavimanya chowotenda wanhu weli na magoda ingawa wakutali nayo.

7 Nihafosa muna uuzidilwa, weye konikaliza,

kogolosa mkono wako wa kulume kunikombola na wehi wangu wonihila.

8 Mndewa Mulungu kezafikiza mbuli zoyanilungile.

Weye Mndewa Mulungu, ulondo wako wokala siku zose.

Sekeuzileke sang'hano za makono yako.