1 Wamweda wanhu waja welibule ubananzi,
waja wozindilila malagilizo ya Mndewa Mulungu.
2 Wamweda waja wotegeleza ukalangama wake,
waja womzahila Mulungu kwa mizoyo yawo yose.
3 Wanhu wano hawatenda mbuli zihile,
mbali wogenda muna zinzila zake.
4 Weye kulava ndagilizi zako,
muladi chizamhe vinogile.
5 Nolonda ugenzi wangu ugangamale,
kwa kuyazindilila malagilizo yako!
6 Maabaho sizagumigwa chinyala,
vonigesa ndagilizi zako zose.
7 Nizakwing'ha hewela kwa moyo wangu wose,
lusita voniifunza mafundizo yako yagoloke.
8 Nizazindilila malagilizo yako,
sekeunileke mbee.
9 Vino mbwanga kodahaze kuulola ugenzi wake kuwa unoga?
Kwa kuzindilila na kutegeleza mbuli yako weye Mulungu.
10 Nokuzahila kwa moyo wangu wose,
sekeunileke niinege na ndagilizi zako.
11 Muumoyo wangu niika mbuli yako,
muladi sekenikuhasanye.
12 Utogoligwe weye Mndewa Mulungu,
unifundize malagilizo yako.
13 Kwa milomo yangu nisimulila,
viya viuhumiza.
14 Nodeng'helela kutegeleza ukalangama wako,
fana munhu yodeng'helela kuwa na vinhu vingi.
15 Nizayagelegeza mafundizo yako,
na kuzigesa ng'hani nzila zako.
16 Nizanogeligwa na malagilizo yako,
na sizazimiza mbuli yako.
17 Unitendele mbuli zinogile niye msang'hani wako,
muladi nidahe kukala na kwamha mbuli yako.
18 Uyagubule meso yangu muladi nidahe kulola
mbuli za mawewedeka muna yamalagilizo yako.
19 Niye nyambenyambe muna iisi ino,
sekeunifise ndagilizi zako.
20 Moyo wangu una hamu ng'hulu,
nolonda kuyamanya mafundizo yako lusita lose.
21 Weye kowakalikila wanhu watatali waja waduwiligwe,
waja hawategeleza ndagilizi zako.
22 Nisegezele kwehuligwa na maligo,
kwaviya notegeleza ukalangama wako.
23 Watawala wokala hamwe na woilunga kunitendela mbuli zihile,
mbali niye msang'hani wako nizayagelegeza malagilizo yako.
24 Malagilizo yako ni deng'ho jangu,
yayo fana vinyandama wangu.
25 Nobimbilisigwa muna ditimbwisi,
uulopole ugima wangu fana viulongile.
26 Nikulongela mbuli zonitendile na kunidika
nifundize malagilizo yako.
27 Nitaze kuvimanya fambulo da ndagilizi zako,
na niye nizayagesa mauzauza yako.
28 Nilegela kwa usungu,
unigume nguvu fana viunilongele.
29 Unisegezele nzila ya uvwizi,
kwa ubazi unifundize malagilizo yako.
30 Nisagula nzila ya kwaminika,
Niyazindilila goya malagilizo yako.
31 Nitegeleza ukalangama wako, weye Mndewa Mulungu,
sekeunileke nigumigwe chinyala.
32 Nokimbilila muna inzila ya ndagilizi zako,
kwaviya kunitenda nivimanye.
33 Mndewa Mulungu, unifunze kwamha malagilizo yako,
maabaho nizayeka goya mbaka kuuhelelo.
34 Unitende nivimanye, muladi nidahe kwamha malagilizo yako,
na kuyazindilila kwa moyo wangu wose.
35 Unilongoze muna inzila ya ndagilizi zako,
kwaviya umo nopata deng'ho jangu.
36 Ugaluse moyo wangu ulonde malagilizo yako,
kufosa kulonda vinhu vovipatika kwa nzila ihile.
37 Unyepule, sekenisondelele mbuli za chakachaka,
unilaguse nzila yako, uning'he ugima.
38 Unitendele fana viunilongele niye msang'hani wako,
muladi udahe kudumbigwa.
39 Unisegezele maligo yonidumba,
kwaviya ulamuzi wako unoga.
40 Nolonda kuzindilila ndagilizi zako,
kwaviya weye kotenda voilondeka, ning'he ugima wa sambi.
41 Weye Mndewa Mulungu unileke niumanye ulondo wako wa kufunya umoyo,
unikombole fana viunilaganile.
42 Baho nizamwidika munhu yoniliga,
kwaviya noihuwila mbuli yako.
43 Sekeusegeze mbuli ya ukweli muna umulomo wangu,
kwaviya nohuwila malagilizo yako.
44 Nizagendelela kuzindilila malagilizo yako yose, sambi na siku zose.
45 Nizagenda kuno niilegeha,
kwaviya nizahila ndagilizi zako.
46 Nizawagong'ondela wafalume ukalangama wako,
na sizawona chinyala.
47 Noyadeng'helela malagilizo yako yoniyalonda.
48 Nozimelela mate ndagilizi zako kwaviya nozilonda.
Niye noyagelegeza malagilizo yako.
49 Ukumbuke chilagano chounilaganile niye msang'hani wako,
kwaviya kunitenda nilolele.
50 Vinikalile muna yamagayo nigumigwa moyo,
kwaviya chilagano chako chining'ha ugima.
51 Weli na magoda wogendelela kuniseka,
mbali niye silekile kuzindilila malagilizo yako.
52 Vinikumbuka malagilizo yako ya umwaka,
nigangamizigwa na weye Mndewa Mulungu.
53 Ningiligwa na ludoko ng'hani kwa ichimu cha wanhu wotenda mbuli zihile,
waja wolema kuzindilila malagilizo yako.
54 Noyemba malagilizo yako,
hohose honikala muna iisi.
55 Weye Mndewa Mulungu, lusita lwa ichilo nodikumbuka zina jako,
kwaviya nozindilila malagilizo yako.
56 Nitemeligwa mate,
kwaviya niyazindilila mafundizo yako siku zose.
57 Mndewa Mulungu niiyo uhazi wangu,
nokwika chilagano cha kuzitegeleza mbuli zako.
58 Nikuzahila kwa moyo wangu wose,
uniwonele ubazi fana vounilongele.
59 Nougesa ugenzi wangu,
na nilamula kuutegeleza ukalangama wako.
60 Sikalame kuzindilila malagilizo yako,
nolopola kuyategeleza.
61 Wanhu wotenda mbuli zihile wahanitataliza nzabi,
sizazimiza malagilizo yako.
62 Nolamka ichilo chikulu kukutogoza,
kwa ichimu cha ulamuzi wako ugoloke.
63 Niye mbwiya wa waja wose wokusang'hanila,
waja wokwamha ndagilizi zako.
64 Isi imema ulondo wako, weye Mndewa Mulungu,
unifundize malagilizo yako.
65 Weye Mndewa Mulungu kunitendela mbuli zinogile niye msang'hani wako,
fana viulongile weye Mndewa Mulungu.
66 Nifundize umanyi na kuhumiza vinogile,
kwaviya nozihuwila ndagilizi zako.
67 Viukalile hunanitagusa nikala nohasanya,
mbali sambi notegeleza mbuli yako.
68 Weye kunoga na kotenda mbuli zinogile,
unifundize malagilizo yako.
69 Weli na magoda wonilongeleza mbuli za uvwizi,
mbali niye nozindilila malagilizo yako kwa moyo wangu wose.
70 Wanhu wano hawayagesa malagilizo yako,
mbali niye noyadeng'helela.
71 Ikala vinoga niye kugazigwa,
muladi nidahe kuifunza malagilizo yako.
72 Malagilizo youyalavile yanoga kumwangu,
yanoga kufosa maalufu ya vihande va hela na zahabu.
73 Makono yako yanilumba na kunigangamiza,
ning'he umanyi nidahe kuifunza malagilizo yako.
74 Waja wokuhuwila wadeng'helele viwoniwona,
kwaviya mbuli zako nozihuwila.
75 Novimanya kuwa weye Mndewa Mulungu kohumiza voilondeka,
na kunitagusa kwaviya weye ni mwaminika.
76 Ulondo wako woniguma moyo,
fana viunilaganile niye msang'hani wako.
77 Uniwonele ubazi muladi nidahe kuwa mgima,
kwaviya noyadeng'helela malagilizo yako.
78 Weli na magoda wagumigwe chinyala kwaviya wanilongeleza uvwizi,
mbali niye nizazigesa ndagilizi zako.
79 Niihanganye na waja wose wokuhuwila,
waja woyamanya malagilizo yako.
80 Moyo wangu sekeuwe na ubananzi muna ukuzindilila malagilizo yako,
muladi sekenipate chinyala.
81 Nilegela kwa kukugozela unilopole,
nokwika uhuwilo wangu muna imbuli yako.
82 Meso yangu yokukila kwa kugozela chilagano chako,
nouza, "Kwizakwiza zuwaki kuniguma moyo?"
83 Niye sifaya chinhu fana mkoba wa mbende wili na masizi,
mbali sinazimiza malagilizo yako.
84 Vino niye msang'hani wako nolondeka nigozele mbaka zuwaki?
Vino kwizawahumiza wehi wangu zuwaki?
85 Weli na magoda wanihimbila lwingilo,
wanhu waja hawasondelela malagilizo yako.
86 Malagilizo yako yose ni ya kweli,
unitaze kwaviya wanhu wonilongeleza vihile.
87 Wakala habehi kuninanga muna iisi,
mbali silekile kutegeleza ndagilizi zako.
88 Wike goya ugima wangu kwa ichimu cha ulondo wako,
niye nizategeleza ukalangama wako woulongile.
89 Weye Mndewa Mulungu, mbuli yako yokala siku zose,
yokwima chigangamavu kuulanga.
90 Uwaminika wako wogendelela nyelesi zose,
kuilumba isi yose, nayo igangamala.
91 Vinhu vose vabaho mbaka diyelo kwa ichimu cha malagilizo yako,
kwaviya vinhu vose vokusang'hanila.
92 One sideng'helele malagilizo yako,
nahafile na magayo yangu.
93 Sizazimiza ng'o ndagilizi zako,
kwa ndagilizi izo kuwika goya ugima wangu.
94 Unilopole niye munhu wako,
kwaviya nizihishimu ndagilizi zako.
95 Wanhu wotenda mbuli zihile wonisepa muladi wanikome,
mbali niye nougesa ukalangama wako.
96 Nivimanya chila chinhu chokuwa na uhelelo,
mbali malagilizo yako yabule uhelelo.
97 Malagilizo yako noyalonda ng'hani,
noyagelegeza imisi na ichilo.
98 Ndagilizi zako zoning'ha ubala kufosa wehi wangu,
kwaviya nozigesa lusita lwose.
99 Nina nzewele kufosa wafundiza wangu wose,
kwaviya nougesa ukalangama wako.
100 Nivimanya ng'hani kufosa walala,
kwaviya nozindilila ndagilizi zako.
101 Niikimilila migulu yangu sekeihite kuna inzila ihile,
muladi nitegeleze mbuli yako.
102 Siyalekile mafundizo yako,
kwaviya kunifundiza weye mwenyewo.
103 Lola mbuli zako zamulile ng'hani kumwangu,
zamulile kufosa uki muna umulomo wangu.
104 Ndagilizi zako zoning'ha umanyi,
na zonitenda niwihile uvwizi wose.
105 Mbuli yako ni chitasa cha magulu yangu,
na bung'hulo da nzila yangu.
106 Niilaha na kuchifikiza chilaho changu,
nizazindilila ndagilizi zako zigoloke.
107 Weye Mndewa Mulungu, niye nigazigwa ng'hani,
uwike goya ugima wangu, fana viulongile.
108 Weye Mndewa Mulungu uhokele nhosa yangu ya kulonda mwenyewo,
na unifunze malagilizo yako.
109 Ugima wangu wozahiligwa ulavigwe lusita lose,
mbali sizazimiza mbee malagilizo yako.
110 Wanhu wotenda mbuli zihile wanhegela mtego,
mbali silekile kuzindilila ndagilizi zako.
111 Malagilizo yako ni uhazi wangu wa siku zose,
yayo ni deng'ho da moyo wangu.
112 Niilunga kuzindilila malagilizo yako,
mbaka siku yondanidanganike.
113 Nowehila wanhu wadelenya,
mbali noyalonda malagilizo yako.
114 Weye konigombela na konikaliza,
nika uhuwilo wangu muna imbuli yako.
115 Mweye mutenda mbuli zihile, segeleni kumwangu,
muladi nidahe kuzindilila ndagilizi za Mulungu wangu.
116 Nike goya kwa ichimu cha chilagano chako na niye nizakuwa mgima,
sekeudileke lolelo jangu jage.
117 Uning'he vinhu vose vonilonda na niye nizalopoligwa,
nizayakaliza malagilizo yako siku zose.
118 Kuwalema wanhu wose hawazindilila malagilizo yako,
kwaviya uvwizi wawo haufaya.
119 Wanhu wose wotenda mbuli zihile kowasa fana viya unyolodo,
ivo noulonda ukalangama wako.
120 Lukuli lwangu logudemeka kukudumba weye,
na noudumba vouhumiza.
121 Nitenda mbuli zinogile na voilondeka,
sekeunileke kwa wanhu wonigaza.
122 Unilaganile kunitaza niye msang'hani wako,
sekeutogole watatali wanilumize.
123 Meso yangu yana luziza kwa kugozela ukombola wako,
na kulolela mbuli igoloke younilongele kwizaitenda.
124 Unitendele niye msang'hani wako fana viya viuli ulondo wako,
unifundize malagilizo yako.
125 Unitendeze niye msang'hani wako nivimanye
muladi nidahe kuyamanya mafundizo yako.
126 Lusita lufika lwa Mndewa Mulungu kutenda usang'hano,
kwaviya wanhu hawazindilila malagilizo yako.
127 Kweli nozilonda ndagilizi zako kufosa zahabu,
ona, kufosa zahabu yelile ng'hani.
128 Nokwamha ndagilizi zako zose,
mbali noihila chila nzila ihile.
129 Malagilizo yako ni ya mwazanyo,
ivo noyazindilila.
130 Mbuli zako zogala bung'hulo,
na hata wabozi wodaha kuvimanya.
131 Nohaha fana mnyama yeli na ng'hilu,
kwaviya noyamelela mate malagilizo yako.
132 Unihindukile na uniwonele ubazi,
fana viutendaga kwa waja wodilonda zina jako.
133 Unilangulize muna uugenzi wangu fana viunilongele,
sekeutogole niye nitawaligwe na wihi.
134 Nilopole na wanhu wonigaza,
muladi nizindilile ndagilizi zako.
135 Unilolese na ulondo wako,
na unifundize malagilizo yako.
136 Meso yangu yokilima masozi,
kwaviya wanhu hawazindilila malagilizo yako.
137 Weye Mndewa Mulungu, weye niiyo unogile,
na kohumiza voilondeka.
138 Kulava ukalangama wako voilondeka,
na kwa uwaminika ng'hani.
139 Kwaviya nokulonda, nopata ludoko ng'hani,
wehi wangu viwozehula mbuli zako.
140 Chilagano chako chofaya ng'hani,
niye msang'hani wako nochilonda.
141 Niye mdodo, iviya nokwehuligwa,
mbali sizimiza ndagilizi zako.
142 Unovu wako wokala siku zose,
na malagilizo yako ni kweli.
143 Nipata magayo na uzidilwa,
mbali ndagilizi zako ni deng'ho jangu.
144 Ukalangama wako unoga siku zose,
unitende nivimanye muladi niwe mgima.
145 Nokupula kwa moyo wangu wose, weye Mndewa Mulungu,
unidike na niye nizayazindilila malagilizo yako.
146 Nokulamba unilopole,
na niye nizauzindilila ukalangama wako.
147 Nolamka chilochilo kukupula unitaze,
nohuwila mbuli zako.
148 Nokala meso ichilo chose,
muladi kuzigelegeza mbuli zako.
149 Weye Mndewa Mulungu, uhulike dizi jangu kwaviya konilonda,
ukombole ugima wangu kwaviya kohumiza voilondeka.
150 Waja woilungila mbuli zihile wahabehi kunifikila,
na wokala kutali na malagilizo yako.
151 Weye Mndewa Mulungu kwahabehi,
na ndagilizi zako zose zokwaminika.
152 Kwandusila umwaka niifunza kulawa muna yamalagilizo yako,
niifunza kuwa kuyeka muladi yasigale siku zose.
153 Ulole magayo yangu na unilopole,
kwaviya sinazimiza malagilizo yako.
154 Unigombele na kunikombola,
uwike goya ugima wangu fana viulongile.
155 Wanhu wotenda mbuli zihile hawezalopoligwa,
kwaviya hawayagesa malagilizo yako.
156 Weye Mndewa Mulungu, ubazi wako mkulu,
uwike goya ugima wangu kwa kusondelela malagilizo yako.
157 Wehi wonigaza ni wengi,
mbali niye siuleka ukalangama wako.
158 Nowalola waja hawahuwila na nowawonela ludoko,
kwaviya hawazindilila mbuli zako.
159 Lola viya vonizilonda ndagilizi zako,
Weye Mndewa Mulungu, uwike goya ugima wangu kwa ulondo wako.
160 Mbuli zako zose ni kweli,
na kohumiza voilondeka siku zose.
161 Wafalume wanigaza bila chimu,
mbali moyo wangu wogudemeka kwa ichimu cha mbuli yako.
162 Nodeng'helela chilagano chako,
fana munhu yotola vinhu va beyi ng'hulu.
163 Nowihila ng'hani uvwizi,
mbali noyalonda malagilizo yako.
164 Nokutogoza miyanza saba chila siku,
kwaviya kohumiza voilondeka.
165 Wana tindiwalo ng'hani waja woyalonda malagilizo yako,
na habule chinhu cha kuwatenda waikwale.
166 Weye Mndewa Mulungu, nogozela unilopole,
na notenda malagilizo yako.
167 Nozindilila mafundizo yako,
na noyalonda ng'hani.
168 Nozindilila malagilizo yako na ndagilizi zako,
kwaviya mbuli zangu zose zomanyika kumwako.
169 Masozi yangu yakufikile weye Mndewa Mulungu,
unitende nivimanye fana viulongile.
170 Tegeleza mbuli zangu zonipula,
unikombole kwa kusondelela chilagano chako.
171 Dizi jangu dikutogoze lusita lwose,
kwaviya konifundiza malagilizo yako.
172 Lulimi lwangu lwokwimba mbuli zako,
kwaviya ndagilizi zako zose zigoloka.
173 Mkono wako uisasale kunitaza,
kwaviya nisagula ndagilizi zako.
174 Weye Mndewa Mulungu nolonda unilopole,
na ndagilizi zako ni deng'ho jangu.
175 Unitende niwe mgima muladi nikutogoze weye,
na mafundizo yako yanitaze.
176 Niwegela fana ng'hondolo yagile,
nizahile niye msang'hani wako,
kwaviya sizimize ndagilizi zako.
/images/a/Tcg2NiV7ce24OT6kCIQGR)
/images/a/-h5KPk8ct3kLpCpYm9-g6)