1 Nizakwing'ha hewela weye Mndewa Mulungu, kwa moyo wangu wose.

Nizazisimulila sang'hano zako zose za unzonza.

2 Nizadeng'helela na kusekelela kwa ichimu chako,

Weye Uli Uchanyha Ng'hani nizadimbila nhogolwa zina jako.

3 Wehi wangu viwobwela kuchisogo,

woikwala haulongozi wako na wodanganika.

4 Kwaviya kuigombela haki yangu,

kukala muna ichigoda chako cha chifalume,

kuhumiza voilondeka.

5 Kuwakalikila wanhu wa zisi zimwenga,

kuwadanganiza wanhu wotenda mbuli zihile,

wano hawezakumbukigwa kaidi siku zose.

6 Wehi wanangigwa siku zose,

mabululu yawo kuyang'ola,

hawezakumbukigwa kaidi.

7 Mbali Mndewa Mulungu kotawala siku zose,

keka chigoda chake cha chifalume yakale na kuhumiza.

8 Kowahumiza wanhu wa zisi zose voilondeka,

kowatawala vinogile wanhu wa zisi zose.

9 Mndewa Mulungu ni mhongono ya wanhu wowoneligwa,

yeye ni mhongono chipindi cha uzidilwa.

10 Wanhu wakumanyile weye Mndewa Mulungu wokuhuwila,

kwaviya weye Mndewa Mulungu huwasa wanhu wokuzahila.

11 Mwimbileni nhogolwa Mndewa Mulungu yokala Sayuni,

Wagong'ondeleni wanhu sang'hano zake.

12 Kwaviya Mulungu kowalihilizila wanhu wogaya,

hawazimiza wanhu wogazigwa viwolila.

13 Weye Mndewa Mulungu uniwonele ubazi.

Lola vinigazigwa na wanhu wonihila.

Unikombole muladi sekenidanganike,

14 muladi niwagong'ondele nhogolwa zako wanhu muna zinyivi za Yelusalemu,

na uko nodeng'helela ukombola wako.

15 Wanhu wa zisi zimwenga wagwa muna dikombo diwahimbile,

wenzeka muna ulwavu lowafisile.

16 Mndewa Mulungu kailagusa kwa kuhumiza voilondeka,

Wanhu wotenda mbuli zihile wanamata kwa sang'hano zawo wenyewo.

17 Wanhu wotenda mbuli zihile wezahita kuzimu,

hamwe na wanhu wa zisi zose waja womzimiza Mulungu.

18 Mbali wanhu wolonda kutazigwa hawezazimizigwa siku zose,

uhuwilo wa ngayengaye hawizakwaga.

19 Inuka, weye Mndewa Mulungu

muladi wanhu wotenda mbuli zihile sekewahume,

uwaduganye haulongozi wako wanhu wa zisi na uwahumize.

20 Weye Mndewa Mulungu, uwatende wadumbe,

wanhu wa zisi wavimanye kuwa wawo ni wanhu muhala!