1 Weye Mndewa Mulungu unikalize,

kwaviya nokukimbilila weye.

2 Nomulongela Mndewa Mulungu,

"Weye Mndewa Mulungu, Mndewa wangu,

vinhu vose vinogile vinilinavo vilawa kumwako."

3 Wanhu welile weli muna iisi, niiwawo weli na muhavu.

4 Mbali wanhu wotambikila milungu imwenga, wezagaya ng'hani.

Sizaitila nhambiko ya damu na sizatambula mazina ya milungu iyo.

5 Weye Mndewa Mulungu weye liziki yangu na chochose chonilonda,

ugima wangu wamuna yamakono yako.

6 Mndewa Mulungu kaning'ha hanhu hanogile ng'hani ha kukala,

Nideng'helela vinhu vose voyaning'hile.

7 Nizamtogoza Mndewa Mulungu yonilongoza,

hata ichilo muna umoyo wangu nogesa mafundizo yake.

8 Nomuhuwila Mndewa Mulungu siku zose,

kwaviya Mulungu kahamwe na niye,

sizadumba bule.

9 Ivo moyo wangu wodeng'helela na lulimi lwangu losekelela,

na lukuli lwangu lwizahumula.

10 Kwaviya hwizauleka muhe wangu kuzimu,

hwizanileka niye munhu wako mwaminika niwole.

11 Kwizanitenda niimanye nzila ya ugima,

kuulongozi wako kuna deng'ho ng'hani,

kuna umkono wako wa kulume kuna mbuli zinogile siku zose.