1 Mweye wanhu wose mdeng'heleleni Mulungu.

2 Imbeni ukulu wa zina jake,

mwing'heni nhogolwa!

3 Mulongeleni Mulungu, "Sang'hano zako za mwazanyo ng'hani!

Wehi wako wogubika meso yawo haulongozi wako, kwa ichimu cha nguvu zako ng'hulu ng'hani.

4 Wanhu wa zisi zose wezakutumbalila mavindi,

na wezakwimbila nyila za kukutogoza,

nyila za kuditogoza zina jako."

5 Izoni mulole mbuli ziyatendile Mulungu,

kawatendela wanhu mbuli za mwazanyo.

6 Kayanyaza mazi ya bahali,

wanhu waloka bahali kwa magulu.

Ivo chimdeng'helele yeye uko.

7 Kotawala siku zose kwa udahi wake,

meso yake yolola zisi zose,

wadugi sekewaigodele.

8 Mweye wanhu wose mtogozeni Mulungu wetu,

gong'ondeni nhogolwa zake zihulikike.

9 Yeye kaching'ha ugima,

na hachilekile chigwe.

10 Kwaviya weye Mulungu kuchigeza,

kuchisafya fana zahabu viifosela muna umoto.

11 Kuchigala muna ulwavu muladi chinamate,

na kuchipapiza mbahasha izamile muna imigongo yetu.

12 Kuwaleka wakwelafalasi wachibojoge,

chifosela muna umoto na muna yamazi,

mbali sambi kuchigala hanhu hanogile.

13 Nizakwiza muna ikaye yako na nhambiko ya kutimbula,

nizatenda fana viniilahile,

14 viniilahile kwa mulomo wangu mwenyewo

vinikalile muna yamagayo.

15 Nizakulavila nhambiko za kutimbula za wanyama wanenehe,

nhambiko za kutimbula za mabebelu ya ng'hondolo zizakunung'hila goya,

nizalava ng'ombe walume na mabebelu ya luti.

16 Izoni mutegeleze, mweye wose womumdumba Mulungu,

nizalonga mbuli ziyanitendele.

17 Kwa mulomo wangu, nimpula yanitaze,

nimtogoza kwa lulimi lwangu.

18 One nigesile mbuli zihile muna umoyo wangu,

Mndewa sigambeyanihulike.

19 Mbali Mulungu kanihulika,

kahulika dizi jangu vonimpulile.

20 Mulungu yatogolwe,

kwaviya halemile chonimpulile,

na halekile kunilonda.