1 Nilonga, "Nizalola nzila zangu,

muladi sekenitende uhasanyi kwa lulimi lwangu.

Wanhu wotenda mbuli zihile wahawa habehi na niye,

nizafudala muladi sekenilonge mbuli ihile."

2 Mbali nikala silonga fana bubu,

ninyamala mbali sipatile muhavu.

Manhesa yangu yaiyoha.

3 Moyo wangu wokwaka,

moto waka muna ukugesa kwangu,

nilonga kwa lulimi lwangu,

4 "Weye Mndewa Mulungu, unilaguse uhelelo wangu,

siku zangu za kuwa mgima zisigala nyingahi,

nivimanye ugima wangu viukimbila!"

5 Humbe kunilingila siku ndodo za kukala!

Ugima wangu si chinhu kumwako,

ugima wa chila munhu ulinga fana mhumuzi.

6 Kweli chila munhu kofosa fana sisila,

kuiyoha kwake kose si chinhu,

koduganya vinhu, mbali hamanya yondayavipate!

7 Lelo Mndewa Mulungu, nogozela choni?

Nokuhuwila weye!

8 Unikombole muna uuhasanyi wangu wose,

sekeutogole wabozi waniseke.

9 Ninyamala, sinula mulomo wangu,

kwaviya weye niiyo unigalile magayo yano.

10 Unisegezele hulo jako,

nigwa kwaviya kunitowa ng'hani.

11 Voumkalikila na kumtagusa munhu yoyose kwa uhasanyi wake,

kobananga utajili wa munhu iyo fana sondo.

Kweli chila munhu ni mhumuzi!

12 "Weye Mndewa Mulungu, uhulike vinipula,

utegeleze vonikulamba unitaze.

Sekeuyehule masozi yangu,

kwaviya niye nyambenyambe wako,

niye mfosanzila fana wasaho zangu wose.

13 Uleke kunitagusa muladi nideng'helele ugima kaidi,

ing'hali sinadanganika na kusegela muna iisi."