1 Mndewa Mulungu unilopole na wehi wangu,

unikalize na waja wolonda kunitowa.

2 Unilopole na waja wotenda mbuli zihile,

unilopole na waja wokoma wanhu.

3 Weye Mndewa Mulungu, lola wonisepa muladi wanikome,

wasede wonitendela mbuli zihile.

Niye siwabanange na sitendile uhasanyi.

4 Siwabanange chinhu, mbali waisasala kunitowa.

Inuka unitaze, ulole mbuli zozilawilila.

5 Weye Mndewa Mulungu, Mulungu Uli na Udahi, Mulungu wa Isilaili,

inuka weye mwenyewo uwataguse wanhu wa zisi zose.

Sekeuwawonele ubazi wanhu woja kuno na kuno.

6 Wokwiza chila ichigulogulo,

wobwaka fana zimbwa,

na wowegela muna dibululu.

7 Lola, muna imilomo yawo molawa maligo muhala,

mbuli zawo zokanha fana panga dikutwa,

mbali wogesa habule yowahulika.

8 Mbali weye Mndewa Mulungu kowaseka,

kowehula wanhu wawo wose.

9 Weye uli nguvu yangu, nizakulola weye,

weye Mulungu niiyo mhongono yangu,

weye niiyo Mulungu younilonda.

10 Mulungu wangu yonilonda kezanilopola.

Nayo kezatenda niwasekelele waja wonilonga mbuli za uvwizi.

11 Sekeuwakome himahima, buleivo wanhu wangu wezazimiza viya viuwatagusa wehi wako.

Mbali weye Mndewa Mulungu kingilo jetu, uwapwililise kwa udahi wako,

na hamwande uwanange.

12 Kwaviya wawo wohasanya kwa mbuli zowolonga,

na mbuli zawo za uvwizi,

ivo wanamate muna yamagoda yawo,

kwa ichimu cha kuduwila kwawo na mbuli zawo za uvwizi.

13 Uwanange kwa ludoko lwako,

uwasegeze sekewawe wagima kaidi,

muladi wanhu wose wavimanye kuwa weye Mulungu kotawala welesi wa Yakobo,

kotawala mbaka kuuhelelo wa isi.

14 Wokwiza chila ichigulogulo,

wobwaka fana zimbwa,

na wozunguluka muna dibululu.

15 Wowegela wozahila ndiya,

na one haweguta, wobwaka fana zimbwa.

16 Mbali niye nizakwimba nhogolwa za nguvu yako,

nizakwimbila wila wa ulondo wako wa kufunya umoyo chila siku,

kwaviya weye niiyo mhongono yangu,

nokukimbilila lusita lwa manhesa.

17 Weye uli nguvu yangu, nizakwimbila wila wa nhogolwa.

Weye Mulungu niiyo mhongono yangu,

weye niiyo Mulungu younilonda.