1 Weye Mulungu, sekeunyamale,

weye Mulungu, sekeunyamale na sekeukale hupi.

2 Lola wehi wako wotenda tibwilitibwili,

lola wokwihila viwokwinula matwi yawo kwa magoda.

3 Woilunga kuwalumiza wanhu wako,

wowagesela vihile waja wouwalonda.

4 Wolonga, "Izoni, chiwanange wose,

muladi zina da Isilaili, sekedikumbukigwe kaidi."

5 Woitogolela hamwe,

wokwika lagano kuwa wehi wako.

6 Wawo woitogolela, wanhu wa Edomu na Waishimaeli,

na Moabu na Wahagali,

7 Gebali na Amoni na Amaleki,

Filisiti na wanhu wokala Tilo woitogolela.

8 Na Waashulu womtaza Lutu wailumba nawo.

9 Uwatendele fana viuwatendele Wamidiani,

fana viuwatendele Sisela na Yabini kuna ichizanda cha Kishoni.

10 Wanhu wouwanangile uko Endoli,

wawa unyolodo muna iisi.

11 Uwatende wakulu wawo fana Olebu na Zeebu,

uwatende watawala wawo wose fana Zeba na Salimuna.

12 Waja walongile, "Leka chisole hanhu ha kudimila ha Mulungu, kuwa hanhu hetu."

13 Weye Mulungu wangu, uwahembeluse,

fana timbwisi da vulavumbi,

fana mafuya, yohembelusigwa na mbeho.

14 Fana moto viutimbula mbago,

hebu milambi ya moto voilunguza milima,

15 uwawinge kwa beho jako,

na uwadumbize kwa beho jako kulu.

16 Uvitende vihanga vawo viwe na chinyala,

muladi walonge nguvu yako ng'hulu, weye Mndewa Mulungu.

17 Wagwe vinyala na wadumbe siku zose,

wafe kwa chinyala.

18 Wavimanye weye kwa dumwe,

zina jako Mndewa Mulungu,

niiyo Wili Uchanyha Ng'hani ya zisi zose.