1 Weye moyo wangu, umtogole Mndewa Mulungu,

vose vili mgati yangu viditogoze zina jake jelile.

2 Weye moyo wangu, umtogole Mndewa Mulungu,

na sekeuzimize mbuli ziyakutendele.

3 Niiyo yolekelela ubananzi wako wose,

na kokuhonya matamu yako yose.

4 Koukombola ugima wako kulawa muna dileme,

kokutemela mate na kokuwonela ubazi.

5 Niiyo yokutendela goya,

nguvu zako zizabwelezigwa fana masumula.

6 Mndewa Mulungu kohumiza vinogile,

kowahumiza voilondeka wose wowoneligwa.

7 Kamtenda Musa yazimanye nzila zake,

na kawatenda wanhu wa Isilaili wazimanye sang'hano zake.

8 Mndewa Mulungu kamema ubazi na unovu,

hawona ludoko himahima, mbali kamema ulondo wa kufunya umoyo.

9 Hezachilongeleza siku zose,

na hezagendelela kuwona ludoko.

10 Hachitagusa kwa uhasanyi fana viilondeka,

na hachilihilizila fana uhasanyi wetu viulondeka kulihilizigwa.

11 Kwaviya fana viya ulanga viuli uchanyha ya isi,

niivo ulondo wake wa kufunya umoyo viuli mkulu kwa waja womdumba.

12 Fana ulawilo wa zuwa viuli kutali na uswelo wa zuwa,

niivo Mndewa Mulungu viyowika kutali uhasanyi wetu.

13 Fana viya tata viyowawonela ubazi wanage,

niivo Mndewa Mulungu viyowawonela ubazi wanhu womdumba.

14 Kwaviya yeye kochimanya viya vochilumbigwe,

na kukumbuka kuwa cheye ni matimbwisi.

15 Ugima wa munhu ulinga fana viya masavu,

kokwalika fana viya luwa da mumgunda.

16 Beho dofosa uchanyha yake na dosegela,

hadiwoneka kaidi hanhu hadikalile.

17 Mbali ulondo wa kufunya umoyo wa Mndewa Mulungu wokala siku zose,

kwa waja wose womdumba,

na unovu wake wokala nyelesi zose.

18 Ulondo wake wokala kwa waja wose wozindilila lagano jake,

na wokumbuka kwamha malagilizo yake.

19 Mndewa Mulungu keka chigoda chake cha chifalume kuulanga,

nayo kotawala vinhu vose.

20 Mtogozeni Mndewa Mulungu, mweye wasenga wake wa kuulanga,

mweye mugangamale, womuitenda mbuli yake,

womuzindilila mbuli yake.

21 Mweye bumbila jake jose da wakalizi wa kuulanga, mtogozeni Mndewa Mulungu.

Mtogoleni Mndewa Mulungu, mweye wasang'hani wake womutenda mbuli zoyolonda.

22 Mweye wose mulumbigwe na Mndewa Mulungu, mtogozeni yeye,

mtogozeni chila hanhu hake hoyotawala.

Weye moyo wangu, umtogoze Mndewa Mulungu.