1 Nikukimbilila weye Mndewa Mulungu,

muladi sekenigwe chinyala.

Unilopole kwa unovu wako.

2 Kinga magutwi na unikombole himahima,

kumwangu uwe fana luwe lwa kukala goya,

uwe fana kaye ili na mhongono ya kunikombola.

3 Weye niiyo luwe wangu na mhongono yangu.

Muladi zina jako dihishimigwe, unikalize na unilangulize.

4 Unilave muna ulwavu luja wanhu luwanitegele,

kwaviya weye niiyo kimbililo jangu.

5 Muna yamakono yako nowika muhe wangu,

kunikombola, weye Mndewa Mulungu, Mulungu mwaminika.

6 Nowehila wanhu wose wotambikila milungu ya uvwizi,

mbali nomuhuwila Mndewa Mulungu.

7 Nizadeng'helela ulondo wako wa kufunya umoyo,

kwaviya kuwona manhesa yangu,

kuumanya moyo wangu muna uuzidilwa.

8 Weye hunigumile muna yamakono ya wehi wangu,

kuyemiza magulu yangu hanhu ha kukala goya.

9 Weye Mndewa Mulungu, Uniwonele ubazi, kwaviya namuna uuzidilwa.

Meso yangu yalegela kwa usungu,

iviya moyo wangu na lukuli lwangu.

10 Ugima wangu umala kwa ichimu cha masozi.

Miyaka yangu imala kwa ichimu cha ndilo.

Nguvu zangu zinimala kwa ichimu cha manhesa yangu.

Nisoka mavuha muhala.

11 Kwa ichimu cha wehi wangu wose,

niwa chilozo kwa wakaya wayangu.

Mbaka mbwiya zangu wodumba kunikwenhukila.

Wahaniona mwiinzila wonikimbila.

12 Nizimizigwa fana nidanganika,

niwa fana nongo itulike.

13 Niwahulika wanhu wengi woinyong'onyela,

ludumbo lwa banzi zose,

viwalonganye vihile kusonhela niye,

wailungila kunikoma.

14 Mbali niye nikuhuwila weye Mndewa Mulungu.

Nilonga, "Weye ni Mulungu wangu!"

15 Ugima wangu wamuna yamakono yako,

unikombole kulawa muna yamakono ya wehi wangu,

na kulawa kwa wose wonigaza.

16 Unilole vinogile niye msang'hani wako,

unikombole kwa ulondo wako wa kufunya umoyo.

17 Weye Mndewa Mulungu, sekeunileke nigwe chinyala,

kwaviya niye nokutanga unitaze,

mbali waleke wanhu wotenda mbuli zihile wagwe chinyala,

waleke wagile kuzimu.

18 Ifudaze milomo ya wanhu wawo wavwizi,

weli watatali na magoda,

waja wowazeha wanhu wotenda mbuli zinogile.

19 Lola unovu wako viwili mkulu,

wouwekile wanhu waja wokudumba,

unovu wouwatendele waja wokukimbilila weye.

Kuweng'ha mbuli zinogile kuno wanhu wose wolola.

20 Kwizawafisa hanhu hanogile baho hawili,

kutali na malungilo yehile ya wanhu.

Kowafisa hanhu hanogile kutali na wehi wawo wowaliga.

21 Mndewa Mulungu yatogolwe,

kwaviya kanilagusa ulondo wake wa mwazanyo,

vinizungulukigwe fana bululu doditowigwa.

22 Niye nidumba na kugesa kuwa kunyasa.

Mbali kuhulika ndilo yangu,

vinikutangile unitaze.

23 Mulondeni Mndewa Mulungu, mweye waminika wake wose.

Mndewa Mulungu kowakaliza wanhu waminika,

mbali waja weli na magoda ng'hani, kezawatagusa ng'hani.

24 Mweye wose womumgozela Mndewa Mulungu,

muwe wagangamavu na mufunye umoyo.