1 Mulungu komanyika muna iisi ya Yuda,

zina jake ni kulu muna iisi ya Isilaili.

2 Kuikaye yake uko Salemu,

hanhu ha ukazi wake niuko Sayuni.

3 Uko kaibena misale ikwaka ya mwihi,

kabena ngao na mapanga na via va ng'hondo.

4 Weye Mulungu kotogoligwa ng'hani,

ukulu wako wofosa milima ikala siku zose.

5 Weli na nguvu wahokigwa vinhu vawo,

lelo wadanganika,

habule hata imwe wa wanhu wa ng'hondo yodaha kwinula makono yake kuchitendela mbuli zihile.

6 Viuwabwakile, weye Mulungu wa Yakobo,

mwihi na falasi wake wadanganika.

7 Weye muhala iyo Mulungu wa kudumbigwa,

Vino yelihi yondayeme haulongozi wako viuwa na ludoko?

8 Kugong'onda nhaguso yako kulawa kuulanga.

Isi idumba na inyamala hupi,

9 weye Mulungu viuhumize,

kuwakombola wanhu wehuligwe muna iisi.

10 Kweli nhaguso yako kusonhela wanhu yokugalila nhogolwa,

na wanhu wakomboligwe kwiing'hondo wezawona ludoko lwako.

11 Mfikizileni vilaho venu Mndewa Mulungu, Mulungu wenu,

wanhu wose wokala muna izisi zili habehi na mweye,

wamgalile vitumetume yeye muhala yodumbigwa.

12 Kosegeza magoda ya watawala,

na kodumbigwa na wafalume wa isi.