1 Nizamtogoza Mndewa Mulungu lusita lose,

nizamtogoza kwa mulomo wangu siku zose.

2 Nizaigoda kwa chiya Mndewa Mulungu choyatendile,

leka wanyendanyenda wahulike na wadeng'helele.

3 Longeni na niye "Mndewa Mulungu yatogolwe,"

chose chidigong'onde hamwe zina jake.

4 Nimpula Mndewa Mulungu, nayo kanidika,

na kanisegezela ludumbo lwangu lose.

5 Wanhu womuhindukila Mndewa Mulungu wadeng'helele,

na vihanga vawo havizagumigwa chinyala.

6 Niye nyondenyonde nimtanga Mndewa Mulungu,

nayo kanihulika,

kanilopola kulawa muna yamagayo yangu yose.

7 Msenga wa kuulanga wa Mndewa Mulungu kowakaliza wanhu wose womdumba Mulungu,

na kowalopola.

8 Gezeni mulole Mndewa Mulungu kanoga,

kamweda munhu ija yomkimbilila.

9 Mdumbeni Mndewa Mulungu,

mweye wanhu wake welile,

kwaviya wanhu womdumba hawezahungukilwa na chinhu.

10 Kweli simba wohungukilwa na chinhu na kuwona nzala,

mbali wanhu womzahila Mndewa Mulungu hawahungukilwa na chinhu chochose chinogile.

11 Wanangu izoni munitegeleze,

niye nizawafunzani kumdumba Mndewa Mulungu.

12 Vino yelihi vimwili yolonda ugima?

Hebu yelihi yodeng'helela kukala vinogile siku nyingi?

13 Ivo uyepule kulonga mbuli zihile na uleke kulonga uvwizi.

14 Uleke kutenda mbuli zihile na utende mbuli zinogile,

na ukale kwa tindiwalo.

15 Meso ya Mndewa Mulungu yowalola goya wanhu wotenda mbuli zinogile,

magutwi yake yowategeleza waja wompula yawataze.

16 Mndewa Mulungu kowatumbila ichisogo wanhu wotenda mbuli zihile,

na kowatenda wanhu wamwenga sekewawakumbuke kaidi.

17 Wanhu wotenda mbuli zinogile wahapula kutazigwa, Mndewa Mulungu kowahulika,

na kowakombola kulawa muna yamagayo yawo yose.

18 Mndewa Mulungu kahabehi na wanhu waja wafile moyo,

kowakombola wose welibule chochose cha kugozela.

19 Wanhu wotenda mbuli zinogile wopata magayo mengi,

mbali Mndewa Mulungu kowalopola muna yamagayo yayo yose.

20 Kokwika goya mavuha yawo yose,

habule hata vuha dimwe dondadibeneke.

21 Wihi wizamkoma munhu yotenda mbuli zihile,

na wanhu womwihila munhu yotenda mbuli zinogile, wezatagusigwa.

22 Mndewa Mulungu kezawakombola wasang'hani wake,

habule munhu yoyose yokimbilila kumwake yondayatagusigwe.