1 Mndewa Mulungu yatogolwe!

Kwaviya vinoga kumtogoza Mndewa Mulungu,

kumwimbila Mulungu wetu wila wa nhogolwa woulondeka ni chinhu chinogile ng'hani.

2 Mndewa Mulungu niiyo yadizengile bululu da Yelusalemu,

kowabweleza Waisilaili wose weli kuuhami.

3 Kowahonya waja wabeneke imizoyo,

na kowaguma moyo wanhu wolumwa.

4 Kozipeta nhondo,

na kozitanga chila imwe kwa zina jake.

5 Mndewa wetu ni mkulu na mwene udahi ng'hani,

umanyi wake wabule uhelelo.

6 Mndewa Mulungu kowenula woinyendanyenda,

mbali kowagwisa wanhu wotenda mbuli zihile.

7 Mwimbileni Mndewa Mulungu kwa nyila za hewela,

mtoweleni bango Mulungu wetu.

8 Kougubika ulanga kwa mawingu,

isi yotonyiligwa na mvula,

na kokoteza savu kuna ivilima.

9 Koweng'ha wanyama ndiya zawo,

na kowalisa makinda ya howe vowolila.

10 Kunogelwa kwake hakwili muna inguvu ya chihongwe,

iviya hanogeligwa na nguvu za watowang'hondo.

11 Mndewa Mulungu konogelwa na waja womdumba,

konogelwa na waja wohuwila ulondo wake wa kufunya umoyo.

12 Mweye wanhu wa Yelusalemu, mtogozeni Mndewa Mulungu,

Mweye wanhu wa Sayuni, mtogozeni Mulungu wenu.

13 Kwaviya kogangamiza mhalalingwe za nyivi zenu,

na kuwatemela mate wanhu wenu.

14 Niiyo yogala tindiwalo muna zimhaka za isi yenu,

na kuwegutiza wanhu kwa ndiya inogile.

15 Kolava lagilizo jake muna iisi,

mbuli yake yofika uko himahima.

16 Kotandika seluji fana mgolole wa pamba,

na kohumulusa nhungwe fana maivu.

17 Mulungu kogala mvula ya mabwe fana msele,

vino yelihi yodaha kwima hanhu hozizima?

18 Kotuma mbuli yake na kuvilumbula vinhu viya,

koditenda beho jake dibume na mazi yakilime.

19 Kamgubulila Yakobo mbuli yake,

kamgubulila Isilaili malagilizo yake na kuhumiza kwake.

20 Haitendele ivo isi imwenga yoyose,

na malagilizo yake hawayamanyile.

Mndewa Mulungu yatogolwe!