1 Mndewa Mulungu yatogolwe!

Wamweda wanhu waja womdumba Mndewa Mulungu,

wamweda waja wodeng'helela malagilizo yake.

2 Wana wawo wezakuwa na nguvu ng'hani muna iisi,

Welesi uja woutenda mbuli zinogile wizatemeligwa mate.

3 Muna zikaye zawo muna vinhu vingi,

mbuli zawo zinogile zokala siku zose.

4 Muna diziza bung'hulo dombung'hulila munhu yotenda mbuli zinogile,

bung'hulo dombung'hulila munhu yeli na ubazi na uhole na yotenda mbuli zigoloke.

5 Wamweda wanhu waja woweng'ha wamwenga kwa makono maidi,

wokwazimisha wamwenga mbali hawalonda limangwe.

6 Kwaviya hawezatingisigwa hata chidogo,

wanhu wotenda mbuli zinogile wezakumbukigwa siku zose.

7 Hawadumba mbuli zihile,

mizoyo yawo igangamala na womuhuwila Mndewa Mulungu.

8 Wagangamala na hawadumba,

mbaka wezawahuma wehi wawo.

9 Walava kwa makono maidi, waweng'ha vinhu ngayengaye,

mbuli zawo zinogile zokala siku zose na wezahishimigwa.

10 Wabananzi viwowona mbuli izo wokuwa na ludoko,

wokwesa ng'hombali kwa kwihiligwa na wopotwa,

huwilo da wanhu wotenda mbuli zihile dokwaga.