1 Nokulamba weye Mndewa Mulungu, luwe wangu,

sekeuwe fana msuwamagutwi kumwangu.

One uhanyamala,

nizakuwa fana waja wohita kuzimu.

2 Hulika dizi jangu vinikulamba unitaze,

vininula makono yangu mchanyha,

kusonhela kaye yako yelile.

3 Sekeunibulule hamwe na wanhu wotenda mbuli zihile,

wanhu wolonga na wayawo mbuli zinogile,

mbali muna imizoyo yawo woilungila mbuli zihile.

4 Uwalihe kwa sang'hano zawo,

kwa mbuli ziya zihile ziwatendile.

Walihigwe kwa sang'hano ziwatendile kwa makono yawo,

uwasang'hanile fana viya viwasang'hane.

5 Wanhu wotenda mbuli zihile hawazigesa sang'hano za Mndewa Mulungu,

hebu sang'hano za makono yake ziyasang'hane.

Kezawananga na hezawazenga kaidi bule.

6 Mndewa Mulungu yatogozigwe,

mana kahulika vinimulambile kunitaza.

7 Mndewa Mulungu niiyo nguvu yangu na kingilo jangu,

nomuhuwila yeye

na nizamwimbila wila wa kumwing'ha hewela.

8 Mndewa Mulungu kowagangamiza wanhu wake,

komkombola na komkaliza mfalume wake yoyasaguligwe.

9 Weye uwakombole wanhu wako na uwatemele mate wanhu wako.

Uwe mdimi wawo na uwapape siku zose.