1 Weye Mndewa Mulungu nhambiko yangu igone,

vonikulamba utegeleze kwa uwaminika wako,

unidike kwa unovu wako.

2 Sekeunihumize kwa kukalika niye msang'hani wako,

kwaviya habule munhu yotenda mbuli zinogile haulongozi wako.

3 Wehi wangu wanisondelela,

waugwisa ugima wangu.

Wanika hanhu heli na ziza,

fana viya munhu yafile umwaka.

4 Nibeneka moyo ng'hani,

moyo wangu ufa nene.

5 Nokumbuka siku za umwaka,

nozigesa sang'hano zako zose,

nozikumbuka ng'hani sang'hano zousang'hane kwa makono yako.

6 Nokugolosela makono yangu nokupula,

moyo wangu wokuwonela hamu fana isi inyalile.

7 Weye Mndewa Mulungu, unidike himahima,

moyo wangu haudahile bule,

sekewiifise kutali na niye,

sekeniwe fana waja wohumuluka kuzimu.

8 Nihulike ulondo wako wa kufunya umoyo imitondo,

kwaviya nikuhuwila weye.

Unilongele nzila ija yondaniigendele,

kwaviya nokwinulila moyo wangu.

9 Weye Mndewa Mulungu unikombole na wehi wangu,

nikukimbilila weye unifise.

10 Unifundize kutenda voulonda weye,

kwaviya weye niiyo Mulungu wangu,

muhe wako yanogile yanilongoze,

muna inzila igoloke.

11 Weye Mndewa Mulungu, kohishimigwa, lelo unihonye,

kwa unovu wako unikombole kulawa muna yamagayo.

12 Kwa ulondo wako uwatende wehi wangu wafudale,

uwanange wanhu wose wonigaza,

kwaviya niye msang'hani wako.