1 Weye Mndewa Mulungu, tegeleza mbuli zangu vinipula!

Uhulike goya viniiyalala.

2 Utegeleze goya vonilila, weye mfalume wangu na Mulungu wangu,

kwaviya nokupula weye.

3 Mndewa Mulungu imitondo kohulika dizi jangu,

imitondo nokupula,

maabaho nogozela unidike.

4 Weye siyo Mulungu yotogola wihi,

wihi haudaha kukala kumwako.

5 Wanhu weli na magoda hawezadaha kwima haulongozi wako.

Weye kowehila wose wotenda mbuli zihile.

6 Kowananga waja wavwizi wose,

Mndewa Mulungu kowehila wakomaji na wavwizi.

7 Mbali kwa ulondo wako mkulu,

nizakwingila muna ikaye yako,

nizakutambikila muna ikaye yako yelile,

na nizakutumbalila mavindi kwa kudumba.

8 Unilongoze Mndewa Mulungu kwa unovu wako,

kwaviya nina wehi wengi,

ugolose nzila yako kuulongozi wangu.

9 Wehi wangu hawezalonga mbuli za kweli,

mizoyo yawo yolonda kunanga muhala.

Viwolonga ni fana ubala,

mbali wosang'hanila milomo yawo kulonga uvwizi.

10 Weye Mulungu uwataguse kwa wihi wawo,

malungilo yawo yehile yawabwelele wenyewo.

Wawinge hanhu hako kwaviya wawo wana uhasanyi mwingi,

kwaviya wawo walema kukutegeleza.

11 Mbali wadeng'helele waja wose wokimbilila ukalizi wako,

wembe kwa kudeng'helela siku zose.

Uwakalize waja wodilonda zina jako,

wadahe kudeng'helela kwa ichimu chako.

12 Mndewa Mulungu kowatemela mate wanhu wose womtegeleza yeye, kowakaliza fana ngao viimkaliza mtowang'hondo.