1 Mulungu yatogolwe.

Mtogozeni Mndewa Mulungu,

ditogozeni zina da Mndewa Mulungu,

mtogozeni, mweye wasang'hani wa Mndewa Mulungu,

2 mweye womusang'hana muna ikaye ya Mndewa Mulungu,

muna uluhelengo lwa Kaye ya Mulungu wetu.

3 Mtogozeni Mndewa Mulungu kwaviya yeye kanoga,

imbeni nhogolwa ya zina jake kwaviya donogeza.

4 Kwaviya Mndewa Mulungu kamsagula Yakobo kwa lungilo jake mwenyewo,

na kawasagula Waisilaili kuwa wanhu wake.

5 Novimanya kuwa Mndewa Mulungu ni mkulu,

na Mndewa wetu ni mkulu kufosa milungu yose ya uvwizi.

6 Mndewa Mulungu kotenda chochose choyolonda kuulanga na mwiisi,

muna ibahali na muna yamazi mengi ng'hani.

7 Kotenda mawingu yagubike isi yose,

kogala lumwemwe na mvula,

na kogala beho kulawa muna yamadungu yake.

8 Kawakoma waudele wa Misili,

waudele wa wanhu na wanyama.

9 Katenda mauzauza na mawewedeko muna iisi ya Misili,

muladi kuwatagusa mfalume wa Misili na wasang'hani wake wose.

10 Kazihuma zisi nyingi,

na kawakoma wafalume weli na nguvu.

11 Kawakoma mfalume Sihoni wa Waamoli,

na Ogu mfalume wa Bashani,

na wafalume wose wa Kanaani.

12 Kailava isi yawo kuwa uhazi,

uhazi kwa wanhu wake Waisilaili.

13 Zina jako dokala siku zose weye Mndewa Mulungu,

kwizakumbukigwa nyelesi zose.

14 Kwaviya Mndewa Mulungu kezawagombela wanhu wake,

na kuwawonela ubazi wasang'hani wake.

15 Nyang'hiti za milungu za isi zilumbigwa kwa hela na zahabu,

zitendigwa na wanhu.

16 Zina milomo mbali hazidaha kulonga,

zina meso mbali hazidaha kulola.

17 Zina magutwi mbali hazidaha kuhulika,

zina milomo mbali hazidaha kuhumula.

18 Waja wozilumba wailinga nazo,

iviya waja wose wozihuwila wailinga nazo.

19 Mweye Waisilaili, mtogozeni Mndewa Mulungu,

mweye welesi wa Haluni, mtogozeni Mndewa Mulungu.

20 Mweye welesi wa Lawi, mtogozeni Mndewa Mulungu

mweye womumuhuwila Mulungu, mtogozeni Mndewa Mulungu.

21 Mtogozeni Mndewa Mulungu kulawa Sayuni,

mtogozeni yokala uko Yelusalemu.

Mndewa Mulungu yatogolwe.