1 Nimgozela Mndewa Mulungu kwa kufunya umoyo,

kakinga digutwi vonimulambile yanitaze.

2 Kanisegeza kulawa hana dikombo digidimile gidigidi,

kanivabula muna inhope,

kanimiza uchanyha ya luwe,

na kayagangamiza magulu yangu.

3 Kanifunza wila wa sambi,

wila wa nhogolwa kwa Mulungu wetu.

Wanhu wengi wezawona na wezadumba,

na wezamuhuwila Mndewa Mulungu.

4 Kamweda munhu yomuhuwila Mndewa Mulungu,

munhu ija hailumba na wanhu weli na magoda,

waja wagile kwa kutambikila milungu ya uvwizi.

5 Weye Mndewa Mulungu, Mulungu wangu,

kuchitendela mbuli nyingi za mwazanyo

na vinhu vouilungile kuchitendela havipeteka,

habule yoyose yalingile fana weye.

One nidahile kusimulila mbuli izo,

sigambenidahe kuzipeta.

6 Nhambiko na nhosa hunogelwe navo,

kunitenda nitegeleze,

nhambiko za kutimbula na nhosa huvilondile.

7 Maabaho nilonga, "Nabaha,

mbuli zonilondeka kutenda zandikigwa muna ichitabu cha malagilizo.

8 Nodeng'helela kutenda viulonda weye, Mulungu wangu,

kweli lagilizo jako damuna umoyo wangu."

9 Nilonga mbuli ya ukombola hana umting'hano mkulu wa wanhu.

Niye silekile kuigong'onda mbuli iyo,

fana viumanyile weye, Mndewa Mulungu.

10 Ukombola wouning'hile, siubagile,

mbali siku zose nigong'onda kuwa weye ni mkombola mwaminika.

Siufisile mting'hano wa wanhu,

ulondo wako wa kufunya umoyo na uwaminika wako.

11 Weye Mndewa Mulungu, sekeunime ubazi wako!

Ubazi wako na waminika wako, vinike goya siku zose.

12 Kwaviya mbuli zihile hazipeteka zinizunguluka niye,

uhasanyi wangu woniminya sidaha hata kuwona,

mwingi kufosa nyele zili muna iditwi jangu.

Niye nifa moyo.

13 Weye Mndewa Mulungu, unogelwe kunikombola,

Mndewa Mulungu, wize hima unitaze.

14 Wanhu woilungila kunikoma wagwe chinyala na wasekigwe,

waja wolonda nilumile wahumigwe na wapate chinyala.

15 Wanhu wodeng'helela vonihumigwa,

wazanywe kwa chinyala chawo!

16 Mbali waja wose wokuzahila weye,

wadeng'helele na watowe ng'henze kwa ichimu chako.

Wokulonda kwaviya kuwakombola,

siku zose walonge, "Mndewa Mulungu mkulu."

17 Niye ngayengaye na nolonda kutazigwa,

mbali weye Mndewa Mulungu konigesa.

Weye niiyo mtazi wangu na mulopozi wangu.

Weye Mulungu wangu, sekeukalame!