1 Mulungu unilopole,

mana mazi yafika muisingo.

2 Nogidimila muna inhope,

habule hanhu ha kubojoga.

Nifika hanhu heli na mazi mengi,

nikulusigwa na mazi.

3 Niguta nyangi mbaka nimalilwa na nguvu,

melo jangu dinyala.

Meso yangu hayalola goya kwaviya nilegela,

nomzahila Mulungu wangu yanitaze.

4 Wanhu wonihila bila chimu ni wengi kufosa nyele zili muna iditwi jangu.

Wehi wangu wowolonda kuninanga wolonga uvwizi kusonhela niye,

woniwangiliza kubweleza vinhu sivibawile.

5 Weye Mulungu kuumanya ubozi wangu,

ubananzi wangu haufisika kumwako.

6 Mndewa Mulungu, Mulungu Wili na Udahi,

sekeuleke waja wokuhuwila wagumigwe chinyala kwa ichimu changu.

Weye Mulungu wa Isilaili,

sekewawone chinyala waja wokuzahila kwa ichimu changu.

7 Mana nizehigwa kwa ichimu chako,

chinyala chigubika chihanga changu.

8 Ndugu zangu wonitendela fana hawanimanyile,

simanyika na waja chelekwe hamwe.

9 Noilonda ng'hani kaye yako,

mbaka moyo wangu wokwaka fana moto,

wanhu wokuliga weye woniliga niye.

10 Vinilila na kufunga kuja,

wanhu waniliga.

11 Vinikalile na ndilo nivala guniya,

mbali wanhu wanyehula.

12 Walangulizi wokala hana ulwivi lukulu lwa bululu wonizeha,

iviya wanhu wakoligwe upele wonizeha kwa nyila zawo.

13 Mbali niye nokupula weye Mndewa Mulungu,

lusita lukufaya weye Mulungu.

Kwa ulondo wako mkulu, weye Mulungu unidike,

na unilopole kwa uwaminika wako.

14 Unilopole kulawa muna inhope,

sekeunileke nididimile.

Unikombole na wanhu wonihila,

unilopole kulawa muna yamazi mengi.

15 Sekeunileke nikulusigwe na mazi,

sekeunileke ningile muna dikombo,

muladi sekenigubikigwe na msanga muna dikombo.

16 Weye Mndewa Mulungu, unidike,

kwa unovu wako mkulu,

unihindukile kwa ubazi wako.

17 Sekeunifise chihanga chako, niye msang'hani wako,

unidike hima, mana namuna uzidilwa.

18 Unikwenhukile na unikombole,

unilopole na wehi wangu.

19 Weye kuvimanya viniligigwa,

vinizehigwa na vinigumigwa chinyala,

weye kuwamanya wehi wangu wose.

20 Maligo yanibena moyo wangu,

ivo nolumila,

nilonda munhu wa kunitaza, mbali simuwonile,

munhu wa kuniguma moyo, nayo simuwonile.

21 Wanikila sungu muna indiya yangu,

na vinikalile na ng'hilu waning'ha siki.

22 Madugila yawo yawe mtego kumwawo,

yawe mtego kwa wambwiya zawo.

23 Meso yawo yagumigwe ziza muladi sekewalole,

na ng'huli zawo ziwe nyondenyonde siku zose.

24 Uwetilile ludoko lwako,

wahumigwe na ng'hasiliki yako.

25 Hanhu hawo ha kukala hawe matongo,

sekekuwe na munhu wa kukala muna yamahema yawo,

26 kwaviya wowagaza waja uwataguse,

na wosimulila mawine ya waja uwazumile.

27 Sekeuzimize ubananzi wawo,

sekeutogole kuwalekelela.

28 Uwasegeze muna ichitabu cha lukumbuso cha Mulungu,

sekewandikigwe hamwe na wanhu wotenda mbuli zinogile.

29 Mbali niye nyondenyonde na mtamu.

Weye Mndewa Mulungu uninule na unikombole.

30 Nizaditogoza zina da Mulungu kwa wila,

nizamtogoza kwa hewela.

31 Mbuli ino izamnogeza ng'hani Mndewa Mulungu kufosa kulava ng'ombe lume,

kufosa kumulavila ng'ombe yeli na mahembe.

32 Wanhu wawoneligwe vondawawone ukombola wangu wezadeng'helela,

mweye womumzahila Mulungu, mugumigwe moyo!

33 Kwaviya Mndewa Mulungu kowahulika waja wolonda kutazigwa,

na hawazimiza wanhu wake wafungigwe.

34 Ulanga na isi vomtogoza yeye,

iviya bahali na vinhu vose vili umo vomtogoza.

35 Kwaviya Mulungu kezadikombola bululu da Sayuni,

na kuyazenga kaidi mabululu ya Yuda.

Wanhu wake wezakala muna yamabululu yayo na isi izakuwa yawo.

36 Wana wa wasang'hani wake wezaihazi isi,

na waja wodilonda zina jake wezakala umo.