1 Nikukimbilila weye Mndewa Mulungu,

sekenigwe chinyala.

2 Kwaviya kotenda voilondeka, unilopole na unihonye,

ukinge digutwi na unilopole.

3 Uwe luwe lwangu lwa kukimbilila,

ulagilize nilopoligwe,

kwaviya weye niiyo luwe lwangu na mhongono yangu.

4 Weye Mulungu wangu, unikombole na wanhu wotenda mbuli zihile,

kulawa muna zinguvu za wasede na wabananzi.

5 Kwaviya nokuhuwila weye Mndewa Mulungu,

nokuhuwila weye Mndewa kwandusila vinikalile mbwanga.

6 Nikuhuwila weye kwandusila vinyelekwe,

weye niiyo unilavile muna iinda ya mami yangu.

Nizakutogoza weye chila siku.

7 Ugima wangu ulinga fana chilaguso chihile kwa wanhu wengi,

mbali weye niiyo kimbililo jangu kulu.

8 Nokutogoza siku yose,

iviya nolonga ukulu wako.

9 Vondanilale sekeunileme,

nihamalilwa nguvu sekeunileke.

10 Kwaviya wehi wangu wonilonga vihile,

wanhu waja wolonda kunikoma wailumba hamwe.

11 Wolonga, "Mulungu kamuleka,

muwinzeni mukamgwile,

na habule munhu yondayamkombole!"

12 Weye Mulungu, sekeukale kutali na niye,

weye Mulungu wangu, ulopole kunitaza.

13 Wose wonilongeleza wagumigwe chinyala na wanangigwe,

wanhu wolonda kunilumiza, wehuligwe na wazehigwe.

14 Mbali nizakulolela chila siku,

nizakutogoza ng'hani.

15 Mulomo wangu wizazilonga sang'hano zako zinogile,

imisi yose nizagong'onda ukombola wako,

mbali kutenda vinhu vikulu kufosa viya vonidaha kuvimanya.

16 Nizakwiza na mbuli za mwazanyo za Mndewa Mulungu,

nizagong'onda unovu wako, weye kwadumwe.

17 Weye Mulungu, kunifunza kwandusila vinikalile mbwanga,

nigong'onda mauzauza yako mbaka diyelo.

18 Mndewa Mulungu vondaniwe mulala na uhenga sekeunileke,

mbaka nigong'onde udahi wako kwa welesi ukwiza,

na nguvu yako kwa wose wokwiza hamwande.

19 Unovu wako, weye Mulungu, umema kuulanga,

weye kutenda mbuli ng'hulu.

Weye Mulungu, yelihi yalingile fana weye?

20 Kunitenda niwone manhesa mengi ya usungu,

mbali kwizanibweleza kulawa muna dikombo digidimile,

weye kwizaninula kaidi kulawa uko.

21 Kwizanyongezela hishima yangu,

na kwizaniguma moyo kaidi.

22 Nizakutogoza kwa bango,

kwa ichimu cha waminika wako, weye Mulungu,

nizakwimbila nyila za nhogolwa kwa zeze,

weye, Yelile wa Isilaili.

23 Nizakwimbila kwa deng'ho,

ona, niye younikombole nizakutogola kwa wila.

24 Nizasimulila sang'hano zako zinogile siku yose,

kwaviya waja walondile kunikoma wagumigwa chinyala na wazehigwa.