1 Weye Mndewa Mulungu, uwataguse wehi wangu,

mana nikala bila kutenda uhasanyi,

kwaviya nikuhuwila weye Mndewa Mulungu bila kusinha.

2 Weye Mndewa Mulungu, unigeze na unilinge,

ulole moyo wangu na magesa yangu.

3 Kwaviya ulondo wako wa kufunya umoyo wonilongoza siku zose,

na nokala kwa ichimu cha waminika wako.

4 Sikala na wanhu wavwizi,

na siilumba na wadelenya.

5 Nokwihila mting'hano wa wanhu wotenda mbuli zihile,

na sizakala na wanhu wotenda mbuli zihile.

6 Nonawa makono yangu kulagusa nabule ubananzi,

notambika hana ulupango lwako, weye Mndewa Mulungu,

7 muladi nigong'onde wila wa hewela,

na kuzisimulila sang'hano zako za kudumbiza.

8 Mndewa Mulungu, noilonda kaye yako youkala,

hanhu houkala ukulu wako.

9 Sekeuninange hamwe na wahasanyi,

iviya sekeunange ugima wangu hamwe na wakomaji.

10 Lusita lose wosang'hana zihile,

makono yawo ya kulume yamema lushwa.

11 Mbali niye nokala kwa unovu,

unikombole na unitendele mbuli zinogile.

12 Niye nima hanhu hagangamale,

nizamtogoza Mndewa Mulungu kuna umting'hano mkulu.