1 Habali Mulungu kuchilema siku zose?

Habali kowawonela ludoko ng'hondolo wa bumbila jako?

2 Uwakumbuke wanhu wako wouwagulile umwaka,

wanhu waja wouwakombole kuwa wako.

Ukumbuke mulima Sayuni, woutendile kaye yako.

3 Fosa uchanyha ya matongo yondayasigale siku zose,

wehi wainanga kaye yako.

4 Wehi wako wobuma haja houiting'hane na cheye.

Wokwika bendela zawo fana chilaguso cha kuhuma!

5 Wavinanga vinhu vose va kaye yako,

fana wanhu wosang'hanila nhemo kukanha mibiki muna imbago.

6 Wakanha mibiki isongoligwe goya ya kaye yako,

waitula kwa nhemo na nyundo.

7 Wahatimbula hanhu hako helile na kuhagwisa hasi,

waitenda kaye ya zina jako yambule mwiko.

8 Walonga muna imizoyo yawo, "Chizawadanganiza ng'hani,"

na watimbula chila hanhu hako ha kuiting'hana muna iisi.

9 Haching'higwe vilaguso va mauzauza kulawa kwa Mulungu,

habule walotezi wasigale,

habule yoyose vichili yovimanya mbuli ino izamala zuwaki.

10 Weye Mulungu, mwihi kezakuzeha mbaka zuwaki?

Vino wehi wezadiliga zina jako siku zose?

11 Habali kobweleza kuchisogo mkono wako?

Uulave mkono wako ukawanange.

12 Mbali Mulungu ni mfalume wangu kwandusila umwaka,

kogala ukombola muna iisi.

13 Kuigola bahali kwa udahi wako,

kuyatula matwi ya mazoka makulu muna yamazi.

14 Kuhonda matwi ya Lewiasani, ng'onyo kulu muibahali,

yawe ndiya ya vilumbe va kuchuwala.

15 Weye kutenda nzasa na vizanda,

weye kunyaza mizanda ikalile na mazi siku zose.

16 Imisi ni yako na ichilo ni yako,

weye niiyo utendile mwezi na zuwa.

17 Weye kwika mhaka zose za isi,

kwika chiangazi na chihuhwe.

18 Mndewa Mulungu, kumbuka viya mwihi viyakuzehile,

na wabozi viwadiligile zina jako.

19 Sekeumwing'he mnyama wa kumbago nziwa wako Isilaili,

siku zose sekeuwazimize wanhu wako wowogaya.

20 Ukumbuke lagano jako,

kwaviya wasede wokala chila hanhu hana diziza muna iisi.

21 Sekeumuleke munhu yawoneligwe yawone chinyala,

ngayengaye na munhu yolonda kutazigwa waditogoze zina jako.

22 Weye Mulungu, inuka uigombele,

kumbuka viuligigwa na wabozi siku yose.

23 Sekeuzimize nyangi za wehi wako,

ndwagi za waja wokulema zogendelela siku zose.