1 Mndewa Mulungu, Mulungu wangu, nokukimbilila,

unilopole na waja wose woniwinza, unikombole.

2 Buleivo wezakwiza kunivavatula fana simba,

wonibulula kutali na habule wa kunilopola.

3 Mndewa Mulungu, Mulungu wangu, one nimtendela mbuli ihile munhu yoyose,

one niyatenda makono yangu yambule mwiko kwa kutenda wihi,

4 one nimtendela zihile munhu yonitendela mbuli zinogile,

hebu nimtenda vihile mwihi wangu bila chimu,

5 leka mwihi wangu yaniwinze na kunigwila,

na yanibojoge mbaka nidanganike,

na kuugoneza ukulu wangu muna ditimbwisi.

6 Weye Mndewa Mulungu, inuka kwa ludoko lwako,

uwatowe wehi wangu.

Inuka, weye Mulungu wangu, uhumize voilondeka.

7 Wanhu wa zisi zose waiduganye kuulongozi wako,

uwatawale kulawa uchanyha,

8 Weye Mndewa Mulungu kowatagusa wanhu wa zisi,

Mndewa Mulungu, unihumize kwaviya nabule ubananzi na notenda fana voilondeka.

9 Weye Mulungu unogile,

youlola magesa na mizoyo,

komeleza sang'hano za wanhu wotenda mbuli zihile

na uwatende wanhu wotenda mbuli zinogile wakale kwa tindiwalo.

10 Mulungu ni ngao yangu,

kowakombola wanhu weli na moyo unogile.

11 Mulungu ni msemi yanogile,

Mulungu yeli na ludoko na wanhu wotenda mbuli zihile chila siku.

12 One wanhu hawalekile uhasanyi,

Mulungu kezanola panga jake,

kezaukwega upinde wake na kulinga shabaha.

13 Kezasasala via va ng'hondo,

na kuihaka usungu misale yake.

14 Lola! Munhu yehile koilunga kutenda mbuli zihile,

munhu yehile kogesa mbuli zihile na kolonga uvwizi.

15 Munhu iyo kohimba kombo digidimile ng'hani,

maabaho kogwa mwenyewo muna dikombo ijo.

16 Mbuli zihile zizampata yeye mwenyewo,

usede wake wizambwelela yeye mwenyewo.

17 Nizamwing'ha hewela Mndewa Mulungu kwaviya kohumiza voilondeka

na nizakwimba nhogolwa za zina da Mndewa Mulungu, Mulungu Yeli Uchanyha Ng'hani.