1 Weye Mulungu wangu uli mfalume wangu, nizakutogola,

nizaditogoza zina jako siku zose.

2 Nizakutogola chila siku,

nizaditogoza zina jako siku zose.

3 Mndewa Mulungu ni mkulu yoyolondeka kutogozigwa ng'hani,

ukulu wake haumanyika.

4 Nyelesi zose wezatogola sang'hano zako,

wanhu wezagong'onda sang'hano zako ng'hulu.

5 Wezailonga hishima yako na ukulu wako,

na niye nizazigesa sang'hano zako za mwazanyo.

6 Wezasimulila nguvu za sang'hano zako za mwazanyo,

na niye nizagong'onda ukulu wako.

7 Wezatenda chelekocheleko kwa ichimu cha ukulu wako,

na wezawimba unovu wako kwa deng'ho.

8 Mndewa Mulungu kana unovu na ubazi,

hahuhile kuwona ludoko, mbali kamema ulondo wa kufunya umoyo.

9 Mndewa Mulungu kanoga kwa wanhu wose,

koviwonela ubazi vinhu vose viyavitendile.

10 Weye Mndewa Mulungu vose voulumbile vizakutogola,

wanhu wako wokwaminika wezakwing'ha hewela.

11 Wezausimulila unovu wa ufalume wako,

na kulonga nguvu zako.

12 Muladi wanhu wose wazimanye sang'hano zako ng'hulu,

waumanye unovu na ukulu wa ufalume wako.

13 Ufalume wako ni ufalume wa siku zose,

Mndewa Mulungu kokwaminika muna zinyelesi zose.

Mndewa Mulungu kotenda chila mbuli iyolonga.

Kokwaminika muna zisang'hano zake zose.

14 Mndewa Mulungu kowataza wose wogwa,

na kuwenula wanhu wose weli na mnamilo.

15 Vilumbe vose wokugozela uwataze,

na weye koweng'ha ndiya yawo lusita lufaya.

16 Koweng'ha kwa makono maidi vilumbe wose na kowegutiza.

17 Mndewa Mulungu kotenda voilondeka,

na kokwaminika muna zisang'hano zake zose.

18 Mndewa Mulungu kahaguhi na wose wowomtanga,

wose wowomtanga kwa ukweli.

19 Koweng'ha wanhu womulonda vinhu vose viwolonda,

kohulika viwompula yawataze na kowakombola.

20 Mndewa Mulungu kowamila wanhu wose wowomulonda,

mbali kezawananga wanhu wotenda mbuli zihile.

21 Nizamtogoza Mndewa Mulungu.

Wanhu wose weli wagima waditogoze zina jake jelile siku zose.