1 Weye Mndewa Mulungu sekeunitaguse na ludoko lwako,

hebu sekeunibwakile kwa ludoko lwako.

2 Kwaviya misale yako inihoma,

na mkono wako unitowa.

3 Lukuli lwangu loluma,

kwa ichimu cha ludoko lwako.

Mavuha yangu yotula,

kwa ichimu cha uhasanyi wangu.

4 Uhasanyi wangu uniyohela fana gombo,

uhasanyi wangu ulinga fana mbahasha izamile ng'hani kumwangu.

5 Malonda yangu yawola na yatunga ufila,

kwa ichimu cha ubozi wangu.

6 Niikonga na niinama ng'hani,

nolila imisi yose.

7 Lukuli lwangu luna mawine,

lukuli lwangu lwose lwausungu.

8 Niwa nyondenyonde na nihondeka ng'hani,

nogutilila kwa magayo yonilinayo muna umoyo.

9 Weye Mndewa Mulungu, magesa yangu yose kuyamanya,

kuugula kwangu hakuifisile kumwako.

10 Moyo wangu wobigima,

nguvu zangu zimala,

meso yangu hayalola goya.

11 Mbwiya zangu na wayangu wokimbila lemela jangu,

ndugu zangu wokala kutali na niye.

12 Waja wolonda kunikoma wotega mitego yawo,

waja wolonda kunitenda vihile wolonga mbuli zihile,

na woilungila mbuli zihile imisi na ichilo.

13 Mbali niye sihulika, nilinga fana msuwamagutwi,

sidaha kulonga nilinga fana bubu.

14 Nilinga fana munhu hahulika,

nilinga fana munhu yelibule chochose cha kuigombela.

15 Mbali nokugozela weye Mndewa Mulungu,

Mulungu wangu niiyo yondaunidike.

16 Kwaviya nilonga, "Sekeuwaleke waniseke,

hebu waigode magulu yangu viyotelebuka."

17 Kwaviya sambi niye nogwa,

usungu wa siku zose wahabehi.

18 Nolonga mbuli zihile zonitendile,

nogaya kwa uhasanyi wangu.

19 Wengi wawa wehi wangu bila chimu,

waja wonihila bila chimu wamema.

20 Waja woniliha mbuli zihile kwa mbuli zinogile zonitendile,

wonilema kwaviya notenda mbuli zinogile.

21 Weye Mndewa Mulungu, sekeunileke,

Mulungu wangu, sekeukale kutali na niye.

22 Weye Mndewa Mulungu uli mulopozi wangu,

wize hima unitaze.