1 Weye Mndewa Mulungu, Mulungu yonikombola,

nokulamba imisi na ichilo.

2 Nhambiko yangu igone,

utegeleze chonipula.

3 Kwaviya moyo wangu umema magayo,

ugima wangu wahabehi kufika kuzimu.

4 Nipetigwa hamwe na waja wokwingila mdikombo,

niwa fana munhu yelibule nguvu.

5 Wanileka hamwe na waja wadanganike,

fana wachinjigwe wagonile muna dileme.

Waja hawakumbukigwa kaidi,

wakutali kutazigwa na weye.

6 Kunitambalisa muna dikombo,

hanhu hagidimile heli na ziza totolo.

7 Ludoko lwako luwa lukulu lonizila,

fana mawimbi yomgubika munhu.

8 Kuwatenda mbwiya zangu wanibagule,

kunitenda sekenigesigwe nawo.

Nihindiligwa mgati na sidaha kuibanga.

9 Meso yangu yana uvulivuli kwa ichimu cha lugano.

Mndewa Mulungu, nokulamba chila siku.

Nokugolosela makono yangu.

10 Vino weye kowalagusa waja wadanganike mauzauza yako?

Vino waja wafile wokwinuka na kukutogoza?

11 Vino ulondo wako wizasimuliligwa kuna dileme?

Vino waminika wako wezasimuliligwa kuna ihanhu ha kunangigwa?

12 Vino mauzauza yako yezamanyika kuna diziza?

Vino mbuli zako zigoloke zizamanyika muna iisi ya chizimizimi?

13 Mbali niye nokulamba weye Mndewa Mulungu, unitaze,

chila imitondo nokupula.

14 Mndewa Mulungu, habali kunilema,

na konifisa chihanga chako?

15 Kwandusila ubwanga wangu mbaka sambi, nigaya na nikala habehi kudanganika,

weye kunitenda nidumbe na nifa moyo.

16 Ludoko lwako luiyoha kumwangu,

mahulo yako ya kudumbiza yonibananga.

17 Yonizunguluka fana gombo siku yose,

yonizila chila ubanzi.

18 Kunisegezela mbwiya zangu na wanhu wangu woniwalonda,

ziza muhala iyo mbwiyangu.