1 Wamweda wanhu waja wosegeziligwa ubananzi wawo,

na wanhu waja wolekeliligwa uhasanyi wawo.

2 Wamweda wanhu waja uhasanyi wawo haupetigwa na Mndewa Mulungu,

wanhu welibule uvwizi muna imizoyo yawo.

3 Vinikalile sinasama uhasanyi wangu,

lukuli lwangu lusoka ng'hani kwa kulila imisi na ichilo.

4 Mndewa Mulungu, kunitagusa imisi na ichilo,

nguvu zangu zifyonzigwa,

fana isi inyalile lusita lwa zuwa.

5 Maabaho nikulongela uhasanyi wangu,

iviya siufisile wihi wangu.

Nilonga, "Nizamulongela Mndewa Mulungu wihi wangu."

Na weye kunilekelela uhasanyi wangu.

6 Ivo chila munhu yokwaminika yakupule lusita vondayawe muuzidilwa,

kweli gombo vondadize hadizamfikila mbee.

7 Weye niiyo hanhu hangu ha kwiifisila,

kwizanikaliza kulawa muna yamagayo,

kunizunguluka kwa madizi ya deng'ho ya ulopozi.

8 Mndewa Mulungu kolonga, "Nizakufunza na kukulagusa nzila ya kusondelela,

nizakufundiza na kukulolesa goya.

9 Sekemuwe fana falasi hebu vihongwe, hawavimanyile mbuli yoyose,

mbaka wafungigwe imilomo na vikimililo, buleivo wezahita kutali."

10 Wanhu wotenda mbuli zihile wezagaya ng'hani,

mbali womuhuwila Mndewa Mulungu,

wezazingigwa na ulondo wa kufunya umoyo.

11 Mdeng'heleleni Mndewa Mulungu, mweye mutenda mbuli zinogile,

toweni ng'henze za kudeng'helela, mweye muli na moyo unogile.