1 Nomulilila Mulungu muladi yanihulike,

nomulandulila dizi Mulungu muladi yanitegeleze.

2 Lusita vinikalile na magayo nimzahila Mndewa,

ichilo nimpula bila kulegela,

na moyo wangu ulema kusangalala.

3 Vinimgesile Mulungu ningiligwa na luholozi,

viniiuzagize, moyo ubeneka.

4 Kunitenda sekenipate nhongo,

nikala na magayo na nipotwa kulonga.

5 Nigesa siku zifosile,

na nikumbuka miyaka ya umwaka ng'hani.

6 Nikumbuka nyila zonikwimbile ichilo,

nigesa na kuiuza muumoyo,

7 "Vino Mndewa Mulungu kachilema?

Vino hezachilagusa ulondo wake kaidi?

8 Vino ulondo wake umala?

Vino chilagano chake hachizalawilila?

9 Vino Mulungu kazimiza kulagusa ubazi?

Vino ludoko lwake lusegeza ulondo wake?"

10 Maabaho nigesa, "Uno niuwo usungu wangu,

Mulungu Yeli Uchanyha Ng'hani kaleka kuchitaza kwa nguvu yake."

11 Nizakumbuka sang'hano zako zose weye Mndewa Mulungu,

kwa vinhu viutendile,

na mauzauza yako ya umwaka.

12 Nizakumbuka sang'hano zako zose,

na kuzigesa sang'hano zako ng'hulu.

13 Weye Mulungu, nzila zako zela,

ni mulungu yelihi yeli mkulu fana Mulungu wetu?

14 Weye niiyo Mulungu youtenda mauzauza,

kulagusa udahi wako kwa wanhu wa zisi zose.

15 Kuwakombola wanhu wako kwa mkono wako uli na nguvu

nyelesi za Yakobo na Yosefu.

16 Mazi viyakuwone weye Mulungu,

mazi viyakuwone yakimbila,

mazi mengi ya bahali yagudemeka.

17 Mawingu yetila mazi,

ng'huwa zibuma kulawa kuulanga,

lumwemwe lumwemwesa banzi zose fana misale.

18 Mbumo wako uhulikika muna divulavumbi,

lumwemwe lwako lumwemwesa isi yose,

isi yose igudemeka na itingisika.

19 Nzila yako ifosela mwiibahali,

nzila yako ifosela muna yamazi mengi,

mbali nyayo zako haziwoneke bule.

20 Kuwalongoza wanhu wako fana viya ng'hondolo,

kwa mkono wa Musa na Haluni.