1 Weye Mulungu, kuchasa na kuchipwililisa,

kukala na ludoko na cheye, mbali sambi uchibwelele.

2 Kuigudemeza isi na kuitula,

uhahonye hanhu hatulike, kwaviya yogudema.

3 Kuchitenda cheye wanhu wako chigaye,

mbaka hachidaha kufunya umoyo.

4 Kwinula bendela muladi kuwalongoza wanhu waja wokuhishimu,

na wadahe kuyepula misale ya wehi.

5 Uchikombole na uchitaze kwa mkono wako wa kulume,

muladi wanhu wouwalonda walopoligwe.

6 Mulungu kalonga kulawa hanhu hake helile,

"Nizaigola isi ya Shekemu kwa deng'ho,

nizadilinga bawe da Sukosi.

7 Isi ya Gileadi yangu na isi ya Manase yangu,

isi ya Efulaimu niijo kingilo da ditwi jangu,

isi ya Yuda niiyo fimbo yangu ya utawala.

8 Isi ya Moabu yonisang'hanila fana ziga da kunawila,

nizayasila isi ya Edomu chilatu changu kulagusa kuwa yangu,

nodeng'helela kupotigwa kwa Filisiti."

9 Yelihi yondayanigale kuna dibululu dili na mhongono?

Yelihi yondayanilongoze mbaka Edomu?

10 Vino weye Mulungu huchilemile?

Huhita kaidi na watowang'hondo wetu.

11 Uchitaze chihaitowa na wehi wetu,

kwaviya kutazigwa na wanhu hakufaya chinhu.

12 Mulungu yahawa na cheye, chizahuma,

na kezawahonda wehi wetu.