1 Mtoweleni ng'henze Mndewa Mulungu mweye mutenda mbuli zinogile,

kumtogoza kowafaya wanhu weli na moyo unogile.

2 Mwing'heni hewela Mndewa Mulungu kwa zeze,

mwimbileni kwa kutowa bango.

3 Mwimbileni wila wa sambi,

toweni vinogile via va nyila na kudeng'helela.

4 Kwaviya mbuli ya Mndewa Mulungu ni ya haki na kweli,

na sang'hano zake zose zokwaminika.

5 Kolonda mbuli zigoloke na kuhumiza vinogile,

isi imema ulondo wa Mndewa Mulungu.

6 Ulanga ulumbigwa kwa mbuli ya Mndewa Mulungu,

na nhondo za kuulanga zilumbigwa kwa mumhuzi ya mulomo wake.

7 Keka mhaka muna ibahali,

mazi mengi yosigala hanhu hake.

8 Wanhu wa ziisi zose wamdumbe Mndewa Mulungu,

waleke wanhu wose wa isi wamuhishimu.

9 Kwaviya kalonga na isi ilumbigwa,

kalava lagilizo na chila chinhu chilawilila.

10 Mndewa Mulungu kogalula malungilo ya zisi zose kuwa si chinhu,

kochibananga chiya chowogesa wanhu.

11 Gesa da Mndewa Mulungu dokala siku zose,

malungilo ya moyo wake yokala nyelesi zose.

12 Imweda isi ija Mndewa Mulungu ni Mulungu wawo,

wamweda wanhu woyawasagule kuwa wanhu wake mwenyewo.

13 Mndewa Mulungu kolola hasi kulawa kuulanga,

kowalola wanhu wose.

14 Kulawa hana ihanhu hoyokala,

kowalola wose wokala muna iisi.

15 Yeye yousa mizoyo ya wose,

kovimanya chila sang'hano yowotenda.

16 Habule mfalume yokomboligwa kwa kuwa na watowang'hondo wengi,

na galu hadaha kuhuma kwa nguvu zake nyingi.

17 Falasi hadaha kumtenda munhu yahume,

na hamulopola munhu kwa nguvu zake nyingi.

18 Ziso da Mndewa Mulungu dowalola waja womdumba,

waja wohuwila ulondo wake wa kufunya umoyo,

19 kuwakombola kulawa muna iifa,

na kuweka wagima lusita lose lwa nzala.

20 Cheye chomgozela Mndewa Mulungu,

yeye niiyo mtazi wetu na kingilo jetu.

21 Mizoyo yetu yomdeng'heleza yeye,

kwaviya chodihuwila zina jake jelile.

22 Weye Mndewa Mulungu, ulondo wako wa kufunya umoyo ukale na cheye,

fana vochikuhuwila weye.