1 Mndewa Mulungu kotawala,

isi ideng'helele,

visiwa vose visekelele.

2 Mawingu na ziza totolo vomzunguluka,

kuhumiza voilondeka na kutenda mbuli zigoloke, niicho chandusilo cha chigoda chake cha chifalume.

3 Moto womulongolela,

wowasoma wehi wake banzi zose.

4 Lumwemwe lwake lumwemwesa zisi zose,

isi iwona na igudemeka.

5 Milima ilumbuka fana uhula haulongozi wa Mndewa Mulungu,

haulongozi wa Mndewa wa zisi zose.

6 Ulanga wogong'onda unovu wake,

na wanhu wose wauwona ukulu wake.

7 Wagumigwe vinyala wanhu wose wotambikila nyang'hiti,

woigodela vinhu havifaya,

mweye milungu yose mtambikileni yeye.

8 Wanhu wa Sayuni wahulika na kudeng'helela,

wanhu wa Yuda wasekelela,

kwa ichimu cha kuhumiza kwako weye Mndewa Mulungu.

9 Weye Mndewa Mulungu kwa Kuchanyha Ng'hani kufosa isi yose,

weye kwa mchanyha ya milungu yose.

10 Mweye womumulonda Mndewa Mulungu, muwihile wihi.

Koukaliza ugima wa wanhu wake,

na kuwakombola muna yamakono ya wanhu wotenda mbuli zihile.

11 Bung'hulo dowalawilila wanhu wotenda mbuli zinogile,

na deng'ho dowalawilila wanhu weli na moyo unogile.

12 Mweye mutenda mbuli zinogile, mdeng'heleleni Mndewa Mulungu,

na kuditogoza zina jake jelile.