1 Mndewa Mulungu, Mulungu Yeli na Udahi kalonga,

kowatanga wanhu wokala muna iisi,

kwandusila ulawilo wa zuwa mbaka uswelo wa zuwa.

2 Bung'hulo da Mulungu domwemwesa kulawa Sayuni,

kudibululu dinogile da Mulungu.

3 Mulungu wetu kokwiza kwa dizi kulu,

moto mkulu ng'hani womulongolela,

na vulavumbi domzunguluka.

4 Mulungu kowatanga wasenga wa kuulanga na wanhu,

muladi wawe wasindila viyowahumiza wanhu wake.

5 Mulungu kolonga, "Niduganyileni wanhu wangu wokwaminika,

waja wowatendile lagano na niye kwa nhambiko ya kutimbula!"

6 Ulanga wogong'onda unovu wake,

kwaviya yeye niiyo yohumiza!

7 "Tegelezeni mweye wanhu wangu, nizalonga,

Weye Isilaili, nizakulongeleza.

Niye iyo Mulungu, Mulungu wako.

8 Siwakalikila mweye kwa ichimu cha nhambiko zenu,

hebu nhambiko zenu za kutimbula, zimugendelela kunilavila.

9 Siwalonda ng'ombe walume kulawa muna yamabumba yenu,

hebu luti kulawa muna ivikwama venu.

10 Kwaviya wanyama wose wa kumbago ni wangu,

na ng'ombe wa vilima elufu ni wangu.

11 Nowamanya ndege wose kuna imilima,

na vilumbe va kumbago ni vangu.

12 One niwile na nzala sigambenimulongeleni,

kwaviya isi yose ni yangu, vose viliumo ni vangu.

13 Vino niye noja nyama ya ng'ombe walume,

hebu nong'wa damu ya luti?

14 Hewela iwe nhambiko yenu kwa Mulungu,

mfikizileni vilaho venu Mulungu Yeli Kuchanyha Ng'hani.

15 Muhagaya nipuleni niye,

nizawalopola na mwizanihishimu."

16 Mbali Mulungu komulongela munhu yotenda mbuli zihile,

"Habali kogong'onda malagilizo yangu?

Habali kolonga mbuli za lagano jangu?

17 Weye kolema kuzumigwa

na mbuli zangu kozasa kuchisogo.

18 Uhamuwona mbavi koilumba nayo,

na weye koilumba na wagoni.

19 Kuuleka mulomo wako ulonge mbuli zihile,

na lulimi lwako lolonga uvwizi.

20 Komulonga vihile ndugu yako,

na komulongeleza uvwizi sekulu wako mwenyewo.

21 Vino niivo viutendile, niye ninyamala hupi,

kugesa kuwa niye nilinga fana weye.

Mbali nizakukalikila,

nizakulongeleza kwa mbuli izo zose.

22 "Geseni goya mbuli ino, mweye womumzimize Mulungu,

buleivo nizawatula vihandehande,

na habule munhu yondayamulopoleni.

23 Munhu yolava hewela fana nhambiko yake,

iyo konihishimu,

na yoyosondelela nzila inogile,

nizamulopola."