1 Mndewa Mulungu yatogolwe.

Mwing'heni hewela Mndewa Mulungu, kwaviya kanoga,

kwaviya ulondo wake wa kufunya umoyo wokala siku zose.

2 Yelihi yodaha kuzilonga sang'hano ng'hulu zose za Mndewa Mulungu?

Yelihi yodaha kuzilonga nhogolwa zake zose?

3 Wamweda wanhu waja wohumiza voilondeka,

na kutenda mbuli zinogile siku zose.

4 Weye Mndewa Mulungu unikumbuke vondauwatemele mate wanhu wako,

vondauwakombole wanhu wako, iviya unikombole na niye.

5 Utende ivo muladi nidahe kudeng'helela viuwatemela mate wanhu wako wouwasagule,

nipate kudeng'helela hamwe na wanhu wa isi yako,

na niigodele weye hamwe na wahazi wako.

6 Cheye na wasaho zetu chihasanya,

chibananga,

chitenda mbuli zihile.

7 Wasaho zetu viwakalile Misili,

hawagesile mauzauza ya Mulungu,

hawakumbuke ulondo wake mkulu wa kufunya umoyo,

mbali wamulema uko kumgwazogwazo mwa bahali ya Shamu.

8 Mbali kawakombola kwa ichimu cha zina jake,

muladi yalaguse nguvu yake ng'hulu.

9 Kaibwakila bahali ya Shamu, nayo inyala,

kawafoseza umo fana muna iisi inyalile.

10 Kawakombola muna yamakono ya wehi wawo,

kawalopola muna zinguvu za wehi.

11 Mazi yawagubika wehi wawo,

hasigale hata imwe wawo.

12 Baho wanhu wake wahuwila mbuli zake,

wamwimbila nyila za nhogolwa.

13 Wazimiza himahima choyatendile Mulungu,

hawagozile magesa yake.

14 Mbali walonda ng'hani ndiya uko kudibwilingu,

wamgeza Mulungu mwiichuwala.

15 Nayo kaweng'ha chiya chiwapulile,

mbali kawagalila mitamu ihile.

16 Kuja kudilago wamuwonela migongo Musa na Haluni,

Haluni niiyo mkulu wa nhambiko yelile wa Mndewa Mulungu.

17 Baho isi itulika na immela Dasani,

imgubika Abilamu na bumbila jake.

18 Moto uwalunguza wanhu wawasondelele,

milambi ya moto iwananga wanhu wawo wotenda mbuli zihile.

19 Waisilaili watenda dang'ang'a da zahabu uko Holebu,

waitambikila nyang'hiti iyo ya chuma.

20 Wauhindula ukulu wa Mulungu,

kuwa fana ng'ombe yoja mgina.

21 Wamzimiza Mulungu mulopozi wawo,

yatendile mbuli ng'hulu muna iisi ya Misili.

22 Wazimiza mauzauza yake muna iisi ya Hamu,

na mbuli za kudumbiza muna ibahali ya Shamu.

23 Mulungu kalonga kuwa kezawananga wanhu wake,

mbali Musa ija yasaguligwe kengilila hagati,

kakimilila ludoko lwake sekeluwanange.

24 Maabaho waizeha isi ija ya kunogeza,

kwaviya hawahuwile chilagano cha Mulungu.

25 Walongelela muna yamahema yawo,

na hawamtegeleze Mndewa Mulungu.

26 Ivo Mulungu kenula mkono kailaha,

kuwa kezawanangila muna dibwilingu.

27 Kawapwililisa welekwa wawo hagati ya wanhu wa zisi zimwenga,

kawagala muna izisi zimwenga.

28 Maabaho wailumba kutambika kwa mulungu yotangigwa Baali wauko Peoli,

waja nyama zilavigwe nhambiko kwa milungu yawo.

29 Wamtenda Mndewa Mulungu yawone ludoko kwa sang'hano zawo,

wapata hulo.

30 Mbali Finehasi kema kutagusa,

na dihulo diya dikimililigwa.

31 Mbuli iyo imulagusa kuwa kana haki,

kwandusila lusita ulwo mbaka welesi wose.

32 Wamtendeza Mndewa Mulungu yawone ludoko kuna yamazi ya Meliba,

na Musa kapata uzidilwa kwa ichimu chawo.

33 Wamulema muhe wa Mulungu,

na Musa kalonga mbuli za chibozi.

34 Hawawakomile wanhu wa zisi zimwenga,

fana Mndewa Mulungu viyawalagilize.

35 Mbali waihanganya na wanhu wa zisi zimwenga,

na waifunza viya viwokala.

36 Watambikila nyang'hiti za milungu yawo,

nazo ziwa mtego kumwawo.

37 Wawalava wana wawo wa chilume na wa chike,

kuwa nhambiko kwa vinyamkela.

38 Wawakoma wana welibule ubananzi,

wawachinja wana wawo wa chilume na wa chike.

Niiwawo walavile nhambiko kwa nyang'hiti za milungu ya Kanaani,

na isi yambula mwiko kwa ukomaji uwo.

39 Niivo viwambule mwiko kwa mbuli ziwatendile,

wamtendela umalaya Mulungu kwa mbuli zawo ziwatendile.

40 Mndewa Mulungu, kawawonela ludoko wanhu wake,

kawehila wahazi wake.

41 Kawaguma muna yamakono ya wanhu wa zisi zimwenga,

muladi wehi wawo wawatawale.

42 Wehi wawo wawawonela,

na wawawangiliza kusang'hana usang'hano.

43 Miyanza mingi Mulungu kawakombola wanhu wake,

mbali wawo wasagula kumuleka,

na wagidimila muna uhasanyi wawo.

44 Mbali kalola uzidilwa wawo,

viyahulike ndilo yawo.

45 Kwa ichimu chawo kadikumbuka lagano jake,

kawawonela ubazi kwa ulondo wake mkulu wa kufunya umoyo,

kaleka kuwona ludoko.

46 Kawatenda waja wawasolile wawawonele ubazi Waisilaili.

47 Weye Mndewa Mulungu, Mulungu wetu, uchikombole,

uchiduganye hamwe kulawa muna izisi zimwenga,

muladi chiding'he hewela zina jako jelile,

na chiigodele sang'hano zako zinogile.

48 Mndewa Mulungu, Mulungu wa Isilaili, yatogolwe,

kwandusila umwaka na siku zose.

Wanhu wose walonge, "Ivo!"

Mndewa Mulungu yatogolwe.