1 Mulungu yenuke, wehi wake wapwililike,

waja womwihila wakimbile na kuhumigwa!

2 Fana yosi viditimuka na beho,

niivo viyowasegeza wawo,

fana uhula viulumbuka muna umoto,

niivo wanhu wotenda mbuli zihile vondawatakamile haulongozi wa Mulungu.

3 Mbali wanhu wotenda mbuli zinogile wezadeng'helela,

wadeng'helele haulongozi wa Mulungu,

wezatowa ng'henze kwa deng'ho.

4 Mwimbileni Mulungu, mwimbileni nhogolwa ya zina jake,

mwimbileni wila yeye yokwela kuna yamawingu fana wanhu viwokwela falasi.

Zina jake Mndewa Mulungu,

ivo deng'heleleni haulongozi wake.

5 Tata wa wachiwa, ndolezi wa wagane,

niiyo Mulungu yokala hanhu helile.

6 Wanhu welibule wanhu wa kukala nawo, Mulungu koweng'ha wanhu wa kukala nawo,

kowalekela wafungwa wailegehe na koweng'ha chiwolonda.

Mbali wanhu womuleka Mulungu wokala muna iisi ilibule mvula.

7 Weye Mulungu, viuwalongolele wanhu wako,

viufosile kuchuwala,

8 isi igudemeka, ulanga ulagaza mvula,

haulongozi wa Mulungu, Mulungu wa Sinai,

haulongozi wa Mulungu, Mulungu wa Isilaili.

9 Weye Mulungu kugala mvula nyingi muna iisi,

isi youweng'hile Waisilaili viilegele, kuitenda iwe na ulongo unogile.

10 Wanhu wako wakala uko,

na weye Mulungu, kwa ubazi wako kuweng'ha ngayengaye mbuli zinogile.

11 Mndewa kolonga mbuli zake,

na wanaake wogong'onda mbuli izo ni bumbila kulu.

12 Wolonga, "Wafalume na watowang'hondo wawo wokimbila!"

Wanaake weli ukaye wogola vinhu vihokigwe.

13 Wamwenga wagona muna ivikwama,

mbali wapata nyang'hiti za mabawa ya nziwa yagubikigwe na hela,

na machipilo yawo yomelemeta zahabu.

14 Mulungu yeli na udahi viyawapwililise wafalume muna iisi,

seluji ilagala kuna umulima Salimoni.

15 Mulima wa Mulungu, mulima Bashani

mulima mtali, mulima Bashani,

16 weye mulima mtali, habali kouwonela migongo

mulima uyasagule Mulungu yakale uchanyha yake?

Mndewa Mulungu kezakala uko siku zose!

17 Hamwe na maelufu na maelufu ya matololi ya Mulungu ya kubululigwa na falasi,

Mndewa kokwiza kulawa mulima Sinai mbaka hanhu hake helile.

18 Viyakwelile kuchanyha ya mulima kasola mateka,

kahokela gweko kulawa kwa wanhu,

mbaka kulawa kwa wanhu watatali.

Lelo Mndewa Mulungu kokala uko.

19 Mndewa Mulungu, yatogolwe,

yeye kochipapila mbahasha zetu chila siku,

Yeye iyo Mulungu yochilopola miyanza mingi.

20 Mulungu wetu ni Mulungu yolopola,

yeye Mndewa Mulungu kanazo nzila za kuibanga na ifa.

21 Mbali Mulungu kezayahonda matwi ya wehi wake,

kezayahonda madosi yeli na nyele ya wanhu waja wogendelela kutenda uhasanyi.

22 Mndewa Mulungu kalonga, "Nizawasola wehi wenu kulawa Bashani,

nizawasola kulawa vilindi va bahali,

23 muladi mubojoge damu yawo kwa deng'ho,

na zimbwa zenu zipate ndiya."

24 Weye Mulungu, wanhu wawona viugenda kwa uhumi,

weye Mulungu, mfalume wangu, viugenda mbaka hanhu hako helile.

25 Wembaji wolongola, wotowa via va nyila wokala kuchisogo,

hagati wandele wotowa vigoma.

26 "Mtogozeni Mulungu hana umting'hano wa wanhu,

mtogozeni Mndewa Mulungu, mweye welesi wa Isilaili!"

27 Kabila dodo da Benyamini jandusa kuwalongoza,

maabaho wandewa wa Yuda na bumbila jawo,

maabaho wandewa wa Zabuloni na Nafutali.

28 Weye Mulungu, lagusa udahi wako mkulu,

udahi ukutendeze kutenda sang'hano ng'hulu.

29 Kwa ichimu cha kaye yako iliuko Yelusalemu,

wafalume wezakugalila vitumetume.

30 Uwakalikile wehi wako waja fana wanyama wa kumbago wokala muna dilamba,

na fana bumbila da mabebelu na ng'ombe walume,

mbaka wanhu wa zisi izo wakwing'he hewela na wakugalile hela.

Uwapwililise wanhu wolonda kuitowa ng'hondo.

31 Wasenga wezakwiza kulawa Misili,

Wakushi wezamgalila Mulungu vinhu vawo.

32 Mwimbileni Mulungu, mweye falume za isi,

mwimbileni nhogolwa Mndewa Mulungu,

33 mwimbileni yeye yokwela kuulanga,

ulanga wa umwaka.

Yeye yobuma kwa msindo mkulu.

34 Gong'ondeni udahi wa Mulungu,

ukulu wake wowoneka muna iisi ya Isilaili,

na udahi wake wolagusigwa kuulanga.

35 Mulungu ni wa kudumbiza,

kulawa helile hake.

Niiyo Mulungu wa Isilaili,

koweng'ha wanhu wake nguvu na udahi.

Mulungu yatogolwe.