1 Weye Mulungu wing'higwe nhogolwa uko Sayuni,

wanhu wezakufikizila vilaho vawo.

2 Kwaviya weye kochidika vochipula.

Wanhu wose wezakwiza kumwako.

3 Vichifa moyo kwa ichimu cha uhasanyi wetu,

weye kochilihila wihi wetu.

4 Wamweda waja wose wouwasagule,

na kuwagala habehi wakale muna uluwa lwako.

Vinhu vinogile muna ikaye yako yelile vochifaya.

5 Kwa sang'hano zako ng'hulu, kochidika voilondeka,

weye Mulungu wouchilopola cheye,

wanhu wose wokuhuwila weye,

wowokala zisi zose na kutali mwa bahali.

6 Kulumba milima kwa udahi wako,

weye kuna nguvu ng'hani!

7 Konyamaza msindo wa bahali na mawimbi yake,

na kozifudaliza nyangi za wanhu.

8 Wanhu wa zisi zose wokwazanywa kwa sang'hano zako,

zogala deng'ho chila hanhu,

kwandusila ulawilo wa zuwa mbaka uswelo wa zuwa.

9 Weye koilolesa goya isi kwa kuigalila mvula.

Koutenda ulongo unoge na chondachihandigwe chikule.

Mifulunda ya Mulungu yofakula mazi,

koitenda isi ipate ndiya ng'hani.

Ivo niivo vousasala isi.

10 Mvula yotonya muna imigunda,

na kuitapagiza kwa mazi,

isi yotonyiligwa mawaga,

na kuitemela mate mibiki isuke.

11 Kuutenda mwaka unoge,

chila haufosele hamema mbuli zinogile.

12 Kohatonyela hanhu ha kudimila kuchuwala,

kulagusa vilima vimema deng'ho.

13 Hanhu ha kudimila hamema ng'hondolo,

mabawe yamema ndiya,

chila chinhu chodeng'helela,

mabawe yokwimba wila.