1 Weye Mndewa Mulungu, uchitaze,

kwaviya habule mwaminika yomdumba Mulungu,

kwaviya wokwaminika wasegezigwa mwa wanhu wamwenga.

2 Chila munhu komvwizila mkaya miyage,

kolonga uvwizi kwa moyo wa udelenya.

3 Mndewa Mulungu, uifudaze milomo ilonga uvwizi,

uzifudagize ndimi zoziigoda.

4 Wolonga, "Chizahuma kwa ndimi zetu,

milomo chinayo, yelihi yodaha kuchitawala?"

5 Mndewa Mulungu kolonga, "Kwa ichimu cha ngayengaye wowoniligwa,

na kwa ichimu cha ngayengaye wogaya,

lelo nizakwima,

nizaweng'ha tindiwalo wowozehigwa."

6 Mbuli ya Mndewa Mulungu yohuwiligwa,

yohuwiligwa fana hela isunhigwe muna ditanuli,

fana hela isunhigwe kufosela muluvimbo miyanza saba.

7 Weye Mndewa Mulungu kwizachikaliza,

siku zose kwizachikaliza na welesi uno wihile.

8 Wanhu wotenda mbuli zihile wozunguluka banzi zose,

viwotogozigwa kwa kutenda mbuli zihile.